Berbalagunok urtarrilean ekin euskarari!!

Kaixo!! Santurtzi Euskaldunak oporrak hartuko ditu urtarrilaren 7ra arte, bitartean ondo pasatzea espero dugu eta nola ez euskaraz mintzatzea!!. Berbalagunok urtarrilaren 12tik aurrera elkartzen hasiko gara. Oraindik izena eman ez baduzu, anima zaitez eta urtarrilean izango gara!!. Hona hemen urtarrilean euskaraz egin dezakeguna!!

Negu Eguna ospatuko dugu!!

Urtero legez Mamarigako Kultur Etxeak jai polit honetara joateko gonbitea luzatu digu. Ohiko ospakizunetatik kanpo eta kontsumismoa baztertuz, Neguko solstizioa (Negu Eguna) jai giroan pasatuko dugu Mamarigan. Noiz? abenduak 23 asteartea, baina adi egon hemen kartela baituzue!!:

Honez gain, ardo eta gazta baten zozketa, Mamarigako Jai Batzordearen tonbola, desio txarrak erreko ditugu.... Beti bezala autogestioaren bidez eta informazio gehiago hemen.

Gabonetako haur parkea

Jarraian dituzue Santurtziko parkean burutuko diren umeentzako ekintzak. Oporrak euskaraz igaro nahi badituzue, hemen duzue aukera:

Larunbatean bertsoz blai BECen!!

Barakaldoko herritik dator notizia … bertsolari onenak aurten Barakaldon… bec, bec… bec, bec, bec… Bertsozaleok hitzordua dugu abenduaren 20an BECen, 5:30ean. Santo Tomas egunean, bai, (beno, Santo Tomas eguna Bilbon bakarrik). Beraz, goizean Bilbon taloak jan, sagardoa edan… arratsaldean, metroa hartuta, Barakaldora bertsoak entzutera… eta gauean ostera ere Bilbora, ospatzera. Plan itzela, ezta?
Etorri gurekin bertso onak gozatzera! Berbalagunentzat ere elkartzeko aukera paregabea!
Sarrerak aldez aurretik erosi behar dira: http://www.botasarean.biz/ orrian (abenduaren 18ra arte) edo BBK-ko kutxazainetan. Kontuz! BECen ez dira salduko eta. (iturria: Bai Esan)

Euskara ametsen giltza!

Larunbatean, euskarari eusteko konpromisoa hartu genuen BECen elkartutako milaka lagunok. 10 urte bete ditu jada Kontseiluak, 10 urte iragan dira Euskal Herriko bost futbol zelai bete genituenetik, eta 10 urte pasa dira Bai euskarari adierazpena aurkeztu zenetik. Abenduaren 13an euskaldunok eta euskaltzaleok pauso bat harago eman genuen: “Bai euskarari”tik “Euskaraz bai” lelora jauzi egin genuen.

Gure hizkuntzaren egoera hauskorra da benetan, euskal hiztunon eskubideak behin eta berriro urratuak izaten dira eta gure eskubideen aurrean begirune falta salatzeko beharra sentitzen dugu. Kontseiluaren urteurrenean elkartu ziren artisten zirkuko ikuskizunek, Xabi Paya eta Uxue Alberdiren bertsoek eta Patxo Telleria eta Mikel Martinezen umoreak behar bezala adierazi zuten nolakoa den egun bizitzen (edo pairatzen) dugun egoera.

Une hunkigarriak ez ziren faltan egon, salaketek beren tokia izan zuten eta barre egiteko uneak ere izan genituen. Musika doinu goxoak entzun genituen. Mikel Urdangarinek Herria eta hizkuntza abestu zuenean, hunkiturik geratu zen BEC, eta txalo zaparrada batekin zendutako Mikel Laboa handiari gure omenaldirik xumeena eskaini genion.

Euskal Herriko txoko guztietatik etorri zen jendetza eta berbalagunok ere BECen egon ginen. Berbalagunok pauso bat harago eman genuen… euskara gure ametsen giltza delako.

Argazki gehiago ikusi nahi badituzu, klik egin hemen!

Berbalagunok Txan handiarekin gozatu genuen

Txan magoari askotan Handia adjektiboa erantsi ohi diote. Handia egiten dituen trikimailuak paregabeak eta apartak direlako, Handia ikuslea erne-erne egotea lortzen duelako une oro, Handia ezeroso sentitu ziren erdaldun batzuen aipu mingotsak oso ondo bideratu zituelako.

Izan ere, mago honen ikuskizuna handia izan zen zentzu guztietan. Zergatik? Bada Bai Esanek berriro ere jendetza bildu zuelako, berbalagun batzuek parte hartu zutelako (urtarrilean ekingo diogu!!), eta batez ere, ohikoa ez den arren euskarak bere tokia hartu zuelako emanaldi honek iraun bitartean.

Hemendik aurrera, euskara poliki-poliki haziz joango da gure herrian, gero eta gehiagotan erabiliko dugulako. Honetan ere beste hainbatek bezala Bai Esan eta Txan Magoak euren ekarpen xume eta tinkoa egin zuten. Hona hemen argazki batzuk (gehiago ikusi nahi baduzue, klikatu honen gainean).

Artxila Murtxila, Txan magoa dator!!

Berriro ere eta gure herrian oso esker onekoak garenez, Txan magoak bisita itzela egingo digu hurrengo ostiralean, abenduak 12 Munich aretoan (arkupeetan) 22:00etan.

Ikuskizun hau ez da nolanahikoa izango, helduentzat izango baita!! Aukera ezin hobea izena eman berri duten berbalagunentzat, eta nola ez euskaltzale guztiontzat!!.

Bai Esan euskara elkarteak (bisitatu bloga) antolatu du ekimen hau, eta denon parte hartzea ezinbestekoa da. Euskarara hurbildu eta gozatu. Ea baten bat kapaz den Txan handiaren trikimailuak deskubritzeko. Nik ezetz esango nuke, hain da trebea mago hau!!.

Plan on eta aparta ostiralerako duguna, berbalagun eta euskaltzaleok ikaragarri goza dezagun!!.

Atzoko Berbalagun aurkezpena mundiala izan zen!!

Atzo denok txundituta gelditu ginen zenbat jende bildu zen ikusita!!. Kresala aretoa txiki geratu zen BERBALAGUN proiektuak piztu duen jakin-mina ase nahi zuten lagunentzat. Hor egon ginen giro alaian Berbalagun programa zertan den argitzen.

Orain falta den bakarra jendeak izena ematea da bide hauek erabiliz:

Santurtziko AEK 94 493 80 71 (Iker)
Udal Euskaltegia: 94 461 02 15
Euskara Saila: 94 420 58 37
Edota email bat idatziz!!.

*Zer dira BERBATALDEAK? Euskaldun osoak (euskalduntze prozesua bukatuta daukatenak) zein euskara ikasten dabiltzanak lauzpabost laguneko taldetan elkartuko dira euskaraz hitz egiteko. Taldeok, adina, zaletasunak, eta disponibilitatea kontuan hartuta osatuko dira. Berbatalde bakoitzak dinamizatzailea aukeratuko du eta denon artean erabakiko dute noiz, non eta zertarako bildu, hori bai euskaraz aritzeko konpromisoa hartuta.

Santurtzi, ekin euskarari!! Argazki gehiago ikusteko, klikatu hemen.

Abenduaren 13an denok BECera!!

Garai heldu zaigu Euskaraz bai esateko, euskararen aldeko hitz politak ondo daude eta beharrezkoak dira, baina ekintzekin lagunduta ez badaude beti geldituko dira herren. Orain hamar urte Bai Euskarari ozen oihukatu genuen, eta aurtengoan abenduaren 13an arratsaldeko 18:00etan BECen Euskaraz bai aldarrikatuko dugu. Gure hizkuntzak biziraun behar duelako eta etorkizun duin bat behar duelako.

Hau dela eta, Kontseiluak (euskararen aldeko mugimenduak biltzen dituen elkartea) ekimen erraldoi hau antolatu du, oraindik ere honelakoak premiazkoak direlako. Beraz, santurtziar euskaltzaleok ez pentsatu bitan eta bete dezagun BEC aretoa!!.

Dohainik bada ere sarrera eskatu behar da nierebanoa web orrialdean, edo bestela Santurtzin bertan AEK eta Udal Euskaltegian, baita taberna hauetan ere: La Luna, Kalea eta Herriko Tabernan (asteartea azken eguna!!).

Ugaztun baten antsiak antzezlana!!

Egia da urteak igaro ahala gauza asko galtzen dugula. Inozentzia esaterako, azkar-azkar galtzen dugu gure barnean behin egon zen umea. Bat-batean gure kezka eta irrikak bestelakoak dira serio eta sakonagoak… Edo hala iruditzen zaigu, eta konturatu gabe haurrak helduak balira bezala tratatzen ditugu, guztiz ahaztuz gu behin erabat libreak izan ginela. Hain libre non nagusion mundua aspergarri samarra iruditzen zitzaigun. Baina garaiak desberdinak dira eta orain umeen kontuak gure ustez umekeriak besterik ez dira…

Ugaztun baten antsiak antzezlanak aurreiritzi horiek guztiak astinduko ditu, gure ustez oso ziurrak diren egitateak auzitan jarriko ditu. Guraso eta seme alaben arteko harremana du abiapuntutzat lan honek, helburu argi batekin: kontzientziak mugiaraztea.

Bada, hurrengo asteazkenean abenduaren 10ean arratsaldeko 20:00etan hitzordu ederra izango du euskarak, antzerkiaz gozatzeko AEK-k antolatu duen emankizun honetan.

Berbalagunak badatoz!!

Azkenik eta lan mordoa egin ostean Berbalagun progamaren aurkezpena egingo da abenduaren 4an arratsaldeko 19:00etan Kresala aretoan.

*Zer dira BERBATALDEAK? Euskaldun osoak (euskalduntze prozesua bukatuta daukatenak) zein euskara ikasten dabiltzanak lauzpabost laguneko taldetan elkartuko dira euskaraz hitz egiteko. Taldeok, adina, zaletasunak, eta disponibilitatea kontuan hartuta osatuko dira. Berbatalde bakoitzak dinamizatzailea aukeratuko du eta denon artean erabakiko dute noiz, non eta zertarako bildu, hori bai euskaraz aritzeko konpromisoa hartuta.

*Zer egin behar da BERBATALDE batean egoteko?. Oso erraza da, izena emateko fitxa bete eta kitto, gainera BERBALAGUNEko Berbataldeetan egotea DOAN da, ez duzu ezertxo ere ordaindu beharko.

Agian azkarregi goaz.. baina hau guztia hobeto ulertzeko etor zaitezte aurkezpenera!. Eta egitasmoaren sustatzaileek (AEK, Bai Esan, Udal Euskaltegia eta Euskara Saila) ondo baino hobeto azalduko dute!!.

Pikor antzerki taldearen Jokaut! lana

Euskarari dagokionez aste oparo honetan Euskara sailak beste proposamen bat luzatu digu. Pikor antzerki taldearen Jokaut antzezlanaz gozatu ahalko dugu abenduaren 5ean ostirala, Kresala arteoan arratsaldeko 17:30etan

Ikuskizun honetan helduen munduaren bortizkeriari buruz hitzegingo dugu, eta gazteek
hura nola ulertzen duten; komunikabideek transmititzen duten bortizkeriari buruz eta
gazteek hura nola harrigarriro irensten duten; objetu eta animalien kontrako bortizkeriari
buruz. Irainen ankerkeriari buruz ere hitzegingo dugu.
Biktimen bakardadeari buruz gogoeta egingo dugu, eta jazarpen ekintza ororen
inguruan ezartzen den isiltasunari buruz, lekukoek, ia beti, nahiago baitute isiltzea.

BeHIak hezkuntzaz hausnartzen??

Bai horixe!! Gaur egungo BeHIak Hezkuntzaz hausnartzen arituko dira. Lasai, baretu animoak berehala ulertuko duzue eta. BeHIak zergatik, bada ekimen hau Kantauri BHIk antolatu duelako!!. Nonbait, hezkuntzari buelta pare bat eman behar zaio eta honetarako ezin hobea da Gorka Velascoren liburuan oinarritutako erakusketa.

Noiz egongo da ikusgai erakusketa?? Abenduaren 3tik 19ra bitartean Kantaurin!!. Gehiago jakiteko idatzi helbide honetara.

Santurtzin... euskaraz... zergatik??

Gure herrian euskaraz egiterik al da??, erderara jo behar dugu ezinbestean, edo posible da hainbat eremutan euskaraz jardutea??, Euskara ikastea ezinezkoa da??..

Zenbatetan egin dizkiogu geure buruari galdera hauek? zenbatetan etsita geratu gara hitz egiteko ezintasuna izan dugulako??. Bada, galdera hauei guztiei erantzun egokia eman guran, Bai Esan euskara elkarteak Santurtzin.. euskaraz... zergatik?? mahaingura antolatuko du hurrengo abenduaren 2an arratseko 20:00etan Kresala aretoan.

Santurtzin euskaraz bizi nahi dugunok bazter guztiak arakatzen ditugu euskaldunen bila, agian horregatik hitzaldi hau. Agian herriko euskaldunok batzeko garaia heltzear da. Ildo honetan Axular, Bihotz Gaztea, Udal Euskaltegia eta AEK-ko hainbat ikasle/irakasle elkartuko dira patxadaz honetan sakontzeko.

Euskara Eguna Santurtzin

Euskararen nazioarteko eguna (abenduak 3) ospatzeko hainbat eragilek proposamen batzuk luzatu dizkigute gure hizkuntzan murgiltzeko.

Itsasoko Ama eskolak jolasak, bertsoak, kantak eta beste hainbeste ekimen gauzatuko dituzte bertako ikasleekin batera. Helbura, nola ez euskarak gure bizimoduan ahalik eta toki handiena hartzea da!!.

Bestetik, Euskara Sailak bi ikuskizun erakargarri antolatu ditu Kresala aretoan:

*Ino, ino, ino... badator Bonbardino antzezlana 17:30ean

*Go!azen film musikalaren estreinaldia 20:00etan.

Seguruenik ere gauza gehiago egongo dira , beraz, animatu eta har ezazue parte. Baina modu berean, euskara ez dela egun batera mugatu behar den gauza bat gogorarazi nahi dizuegu. Izan ere, gure hizkuntza egunero landu beharrekoa da, egun guztiak, ordu guztiak eta minutu guztiak izan daitezela euskararen pizgarri!!.

Haurrak 12 orduz euskaraz!!

Denok ezaguna da euskaraz hitz egiteko esparruak oso mugatuak direla. Euskaldunak egon badaude, eta Ezkerraldeko herri gehienetan legez, ia-ia ume guztiak euskaldunak dira. Bada, ume hauek euskaraz murgil daitezen aukera paregabea daukagu larunbat honetan, azaroak 29 Santurtziko erdialdean (parkea eta inguruak). Hona hemen BIGE-K(BIZKAIKO GURASO ELKARTEAK) antolatu duena:

• 9:30etan 12 orduz euskaraz ekimena hasiko da, bertan musika, jolasak, antzerkiak, bertsoak eta abar egongo dira. Ordu horretan ere Nafarroako Kutxak Euskal Pilota erakusketa irekiko du bere egoitzean.


• 10:00etan haurrentzako puzgarriak Lau joko, Lau kontinente. Karpan ere tailerrak egongo dira. Kalez kale erraldoiak ibiliko dira, baita udal musika banda ere.


• 12:00etan Eneko eta Miyukik beren bidaien gaineko hitzaldia eskainiko dute Kresalan. Honen ostean Eskoletako umeak bertsotan arituko dira Karpan.


• Benta zaharreko mutiko alaiak kalez kale ibiliko dira abesten. Marsel magoak ikuskizun ederra burutuko du karpan.


• 17:00etan Kanpanolue taldeak umeentzako berbena egingo du.


• 18:00etan Trapero del Rio antzerki taldeak Salam lana eskainiko digu.


• 19:00etan maratoi honi bukaera emateko Aiko erromeria taldeak dantzan jarriko gaitu.

Egia esan, Santurtzin hamabi orduz euskaraz aritzea posible izango da. Beraz, aukeratu eta gozatu!!

Kultur Etxeko ikasturte hasierako jaia!!

Berriro ere Mamarigako Kultur Etxea dugu hizpide. Autogestioaren bidez diharduen eragile honek esker ona helarazi nahi dio bere ekimenetan parte hartzen duen orori. Izan ere, aurten 10 ikastaro baino gehiago du abian jada, haietako asko euskara hutsean: bertsolaritza, panderoa, txalaparta, perkusioa… Honez gain, gelak beti beteta egoten dira auzotarren bilerak direla, musika taldeen entseguak direla, Mamarigako Abesbatza dela… Laburbilduz: sekulako kultur dinamika dago!!

Hau guztia ospatzeko, Kultur Etxekoek ikasturte hasierako jaia prestatzea erabaki dute. Azaroaren 28an arratsaldeko 19:30etik aurrera, jai giroan bilduko dira etxeak izan dituen berrikuntza lanak, ikastaroetan egiten diren gauzak eta esperientzia desberdinei buruz berba egiteko. Betiere sabela ederki beteta eskura eduki duten askari oparoari esker!!. Gehiago hemen.

Ipuinez gozatzeko aukera itzela...

Kandelen Argipean izeneko taldeko partaidea da Begoña Gómez ipuin kontalaria. Berarekin belarriak, begiak eta irudimena berotu eta ondo zabalduta, prest egongo gara elkarrekin ipuinak kontatu eta entzuteko. Euskara Sailak antolatuta, ipuin-saio honetan denon artean lortuko dugu entzungo ditugun istorioetako protagonistei bizitza ematea eta beraiekin barre egitea.

Etorri Kresala Aretora hurrengo ostiralean, hilaren 28an, arratsaldeko 20:00etan eta elkarrekin ipuinez gozatuko dugu!.

Haurrak zinemara doaz!!

Haurrentzat bideratutako Pepper pelikula ikusteko aukera izango da SKA aretoan, azaroaren 27an. Pepper txakur berezia da: hitz egiten daki, eta gainera, aberatsa da. Izan ere, diru mordoa jaso du oinordetzan. Hori dela eta, arriskuan dago, lapur batzuk haren atzetik baitabiltza. Lapur horietaz ihesi, Pepper txakurrak babesa bilatuko du Singerdarren etxean. Bertako kide den Felix mutiko bakartiaren laguna egingo da Pepper. Txakurra bezain berezia da mutikoa, egun osoa tigre jantzita ematen baitu. Elkarrekin, arrisku ugariri egingo diote aurre.
Eskola orduetan izango da, Euskara Sailaren eskutik.

Nomadak Santurtzira iritsiko dira!!

Oraindik Oreka TX txalaparta taldeak sortutako filma ikusi ez baduzue, zortekoak zarete. Izan ere, ostiral honetan, azaroak 21 arratsaldeko 20:00etan ezinbesteko hitzordua dugu Kresala Aretoan Euskara Sailaren eskutik.

Nomadak dira pelikula eder honen abiapuntu eta helmuga. Munduan geratzen diren azken ibiltariak, kultura aberats eta zahar baten babesle zorrotzak. Sahara, Mongolia, Laponia.. Txoko miresgarri hauek ezagutzeaz gain, Igor Otxoa eta Harkaitz Martinez de San Vicenteren balentriak eta txalaparta jotzeko trebeziaz gozatuko dugu.

Izotza, harria, egurra, txalapartari hauentzat ez dago ohiko txalaparta berritzeko eragozpenik. Dena da posible, dena da egingarria musikaren bidez haien bizipenak helarazten dizkigutelako. Bada ostiralean besaulkian ondo uzkurtuta, geu ere nomada bilakatuko gara, Nomadak TX

Haurrentzako berbena!!

Larunbat honetan, azaroak 22, gure herriko haurrek gerria astinduko dute konplexurik gabe. Txorromorro taldeak gramola haur dantzaldi dibertigarria egingo du umeen parte hartzea ziurtatuz.

Dantza eta jolasen bidez, etxeko txikienek gainerako umeekin zein Txorromorroko kideekin ikaragarri ondo pasatzeko aukera izango dute. Gainera, larunbateko eguerdian 12:00ak aldera, ba al da plan hoberik??. Bada hori udazkena bukatzear dugula Euskara Sailak antolatutako ekitaldi hau ere aprobetxatu beharko dugu. Anima zaitezte eta ea zelako erritmoa dugun!!

Ni naiz Hector, ni bakarrik.

Santurtziko antzerkizaleok zorionekoak gara aste honetan, zeren eta bi emanaldi edukiko baititugu. Lehena aurreko berrian agertutakoa da, eta bigarrena Ni naiz Hector, ni bakarrik antzezlana.

Jokin Oregik idatzitako antzezlan hau ostegunean, azaroak 20, ikusi ahal izango dugu arratseko 20:30ean SKAn Euskara Sailaren eskutik. Prezioa 6 eurokoa da, baina AEK edo Udal Euskaltegiko ikaslea bazara, merkeago aterako zaizu!!. Beraz, ez geratu ilargiari begira eta anima zaitezte!!.

Hona hemen sinopsia:

Hectorrek, bere buruan ahotsak (Nia 1 eta Nia 2) entzuten dituela eta, konponbide bila bere maitasun platonikoa den Esti psikologoaren kontsultara joatea erabakiko du. Tartean, ordea, Estiren ama Carla sartuko da, zeina psikiatra den, eta gauzak are gehiago korapilatuko dira. Hectorrek, alde batetik, bere Nia1 gogaikarriari eta joera suizidak dituen Nia2ari egin beharko die aurre, eta, bestetik, Estirekiko erakarmena bideratu beharko du. Era berean, Estik bere depresioari eta amak eragindako gatazka guztiei egin beharko die aurre. Eta hau guztia komedia erromantikoen klabeak erabiliz, egoera absurdo eta umoretsuei leku eginaz.

Zeru Gaineko Berlin.

Irudi ederrak, ametsetakoak, ikusteaz batera geure buruan irudikatu ditzakegunak, sentitu eta gozatu. Gainera, imajinek musika izango dute lagun, azaltzeko bide; eta honi esker giro liluragarria sortuko da, Kresalako besaulkietatik Berlineraino eramango gaituen erritmo barean. Eta hauxe izango dugu hurrengo asteazkenean, azaroak 19, arratsaldeko 20:00etan Kresala aretoan.

Zeru Gaineko Berlin ez da nolanahiko antzezlana. Hala Bedi irratsaio batetik sortutako ideia da, Celosamente Gordea saiotik ateratakoa. Irudiak, elkarrizketak eta musika nahastuko dira bakardade, maitasun nahiz denboraz hitz egiteko, betiere gauza bat nabarmenduz: Haurtzaroan genuen harritzeko kapazitatearen galera.

Eta oraindik ere harritu ahal garelakoan, zur eta lur geldituko garelakoan elkar ikusiko dugu Berlinen. Euskaraz amesten, Bai Esan euskara elkarteari esker.

Haur dantzaldia Santurtzin!!

Betizu eta oilarraren kukurrukua ikuskizuna hurrengo larunbatean (azaroak 15) izango dugu J.J. Mendizabal plazan eguerdiko 12:00etan.
Bertan ohi bezala, dantza, txantxa, barre, salto egingo dugu!. Betizu behi bihurri hauek prestatutako azken emanaldia ikusi nahi baduzue, ezin duzue huts egin. Gainera, hil honetan tankera bereko beste berbena bat izango dugu bi larunbatetan. Hau lehenbizikoa izango da Euskara Sailak bultzatu duen Udazkena Euskaraz kanpainaren barnean.

Beraz, larunbat honetan euskaraz gozatzeko aukera duzu, non eta Santurtziko kaleetan!!. Hori bai, dantzatzen hasi aurretik ondo berotu. Osterantzean zaintiratuak eta axubetak izango dituzue!!

Euskal Herriko ohitura zaharrak

Kaixo!!!
Ostiral honetan arratsaldeko 20:00etan hitzordu polita izango dugu kresala aretoan. Bertan gure ohituren inguruan egingo dugu berba, zein diren, nondik datozen. Felix Mugurutza etnografoak bere ezagutzak gurekin guztiokin partekatuko ditu eskema zaharkituren bat baino gehiago hautsiz. Euskaldunok gure usadion jakitun garela denon ahotan dabil, baina euskaldunok Gabonak betidanik ospatu ditugu?, Olentzero noiztik dugu ezagun?, eta gure ospakizunak guk uste bezain paganoak ziren??.

Urriaren 14an, Euskara Sailak antolatutako ekimen honetan, galdera hauei erantzun egokia eman ahal diezue ekitaldi honetan parte hartzen baduzue, bestela zuen jakin-mina ase barik geratuko da!!

Elvi sabeliztuna bere panpinekin dator!!

Pentsa ezazue zenbat denbora igaro den sabeliztun bat edo bentrilokuo bat ikusi zenuten azken alditik... Bufff aspaldidanik ezta??. Eta euskaraz zenbat bider?? Behin ere ez?.

Zuek egoera horretan bazaudete, ezin diozue ikuskizun honi muzin egin. Barrez lehertu, eta algara dela medio besaulkian sartu ezinik egon nahi baduzue, Elvi sabeliztunak irribarre andana ateraraziko dizue.

Izan ere, ordubeteko saio honetan bere panpin ezagunak agertzeaz gain, umoreak, magiak eta abestiek aldarte onean jarriko gaituzte!!.

Noiz: Ostiral honetan, azaroak 7 arratseko 19:00etan.

Non: Kresala Aretoan..

Antolatzailea: Euskara Saila.

Ahh eta emanaldia bukatu baino lehen, jende artetik bi panpin berri agertuko dira. Nortzuk izango ote diren ikusteko dago.

Munduko bira jolasean.

Hurrengo larunbatean, azaroak 8, agian ez duzu aparteko planik izango. Beharbada ohean geratzeko asmoa duzu gozo-gozo. Baina Munduko bira jolasean egin daitekeela jakingo bazenu.. beharbada nagiak aterako zenituzke eta bita pentsatu barik euskarari eragingo zenioke. Gainera, goizeko 11:00etatik aurrera eta goiz osoan izango dela jakin ondoren, lozorroan geratzeko plan hori guztiz baztertu beharko zenuke eta ekimen honetan parte hartu!!.
Euskara sailak Udazkena Euskaraz kanpainaren barruan kokatu duen ekintza honek helburu hauek ditu:

• Lehen hezkuntzako umeekin jarrera eta jokabide arrazisten prebentzioa lantzea.


• Jolasa eta tailerren bidez kultura ezberdinen ezagutza ahalbidetzea.

Kontinente guztiak ezagutu gura badituzu, parkean duzu hitzordu hau.

Azaroa ekitaldietan oparoa!!

Atzera ere agenda berria dugu!! Eta ikusten ari zaretenez ekitaldi ugari dago. Orain anima zaitezte eta bizi euskaraz!!. Hona hemen azaroko agenda.

Euskara zine aretoetara!!

Ene!, euskarazko zinema ere badago Santurtzin. Egia esan oso pelikula gutxi ikusten dugu euskaraz. Aukera gutxi edo beharbada ohitura eza. Orain etxeko txikienek bi hitzordu izango dute aste honetan Euskara Sailak prestatu dituen emankizunei esker:

• Asteartean, urriak 28, Nany McPhee pelikula eskainiko dute SKA aretoan. Hona hemen laburpena: Nany McPhee ezohiko umezaina da botere magikoak baititu. Brown jauna berriki alargundu da eta laguntza behar du haurrak hezteko. Hara abiatuko da Mc Phee, baina Brown jaunaren zazpi semeak hamaika bihurrikeria egindakoak dira eta dagoeneko 17 umezain uxatu dituzte. Berriro egingo ote dute??.
  
• Ostiralean, urriak 31, Franklin eta Lakuko Altxorra pelikularen txanda izango da: Franklin gozatzen ari da udako opor egunetan; halako batean, familiak Licieren, altxor ehizan buru belarri diharduen izeba arkeologoaren ezusteko bisita izan du.
  
  
  

Bertso Afaria ostiral honetan!!

Bertsolaritza sendo dabil geure herrian. Orain urte batzuk bertso saio gutxi izaten zen, baina azken boladan era honetako ekintzak ugaritu dira. Bertsozaleok ostiral honetan izango dugu aukera Jon Martin eta Arkaitz Oiartzabal “Xamoa” bertsolariekin egoteko. Izan ere, Ezkerraldeko Asanblada Antidesarrollistak bertso afari bat antolatu du ostiral honetarako, urriak 24, La Kelo Gaztetxean.
Hitzordua 21:30ean izango da eta izena emateko xedea baduzue deitu telefono honetara 617 767 989 edo pasatu La Kelotik.

Uda igaro ostean eta bertso-lehorte luze hau gainditu nahi baduzue, ez pentsatu bitan eta anima zaitezte!!

Euskara Sencilloaren manifestua (antzezlana)

Euskara hotza, urruna, laborategikoa… Euskaldun berriok sarritan horrelako baieztapen mingarriak entzun ditugu erabiltzen dugun euskararen inguruan. Euskaldun zaharren aurrean lotsatuta eta burumakur azaldu ohi gara hanka sartzearen beldurrez, hitzak etengabe neurtuz eta azkenean suminduta erdaraz erantzun digutenean…

Bada, Euskara Sencilloaren Manifestuaren bidez euskaldun berrion ahalegina goraipatzen da. Euskara errazagoa, hurbilagoa eta beroagoa izan daitekeelako. Zer demontre, euskaldunok finean ez dugulako zertaz lotsatu, ez al dugu ahalegin handia egin euskara ikasteko??. Horixe baietz!!

Asteazkenean arratsaldeko 20:00etan, urriak 22, barrez lehertu nahi baduzu, Bai Esan euskara taldeak oso gonbidapen tentagarria egin digu: Kresala aretora hurbildu eta bikote euskaldun berri honen abenturez gozatu!!.

Umeentzako ekintzak Serantes, Las Viñas eta Itsasoko Ama ikastetxeetan.

Urriaren 22tik aurrera Ikastetxe hauetako haurrek euskaraz murgiltzeko aukera edukiko dute klasetik at. Eskaintza ezin zabalagoa da, (mosakikoak, papiroflexia, gynkhanak, idazkera, jolas kooperatiboak, apainketak, antzerkia, kultura aniztasuna…). Umeen arteko harremana sendotzeari begirako jolas mordoa antolatuko du Keima taldeak Euskara Sailak sustaturik.

Egia esan, ez dirudi aspertzeko betarik egongo denik, ez behintzat ekimen honetan parte hartzen bada. Gainera, nork ez du oroitzen txikitan zenbat ordu ematen genuen olgetan telebistari jaramonik egin gabe? Bada, orain euskaraz egin daiteke, eta egia esanda, bideo jolasak egun batzuetan baztertzeagatik…

Ezkerraldeko eta Meatzaldeko ikasle eguna.

Agendatik kanpo geratu zaigun ospakizun baten berri eman behar dizuegu. Berau Ezkerraldeko eta Meatzaldeko Ikasle Eguna dugu Ikasle Abertzaleak taldeak antolaturik. Larunbat honetan, urriak 18, izango da eta egun osoan hamaika ekimen edukiko dugu ikusgai. Hona hemen egitaraua:

• 12:00etan Santurtziko parketik kalejira.


• 13:00etan Aurkezpena, eta ondoren poteoa.


• 15:00etan Herria Bazkaria.


• 17:00etan Jolasak


• 20:00etan Kontzertuak Non ote? eta Bertan Behera taldeen eskutik.


• 24:00etan Jaialdiaren bukaera.

Bazkaria 5€ Kontzertuak 5€

Bazkaria+Kontzertuak 8€

Ekitalde gehienak La Kelo Gaztetxean gauzatuko dituzte, beraz, parte hartu nahi izanez gero, badakizue nora jo. Bestetik, ikasleak ez bazarete ere parte har daiteke. Ez ezazue jarri aitzakiatzat jada ikasleak ez zaretenik!!

Ikastaroak hastear daude

Aurrekoetan aipatu legez, Mamarigako Kultur Etxeko ikastaroak martxan hastear daude. Noiz? Bada asteazken honetan, urriak 15, etxe honetako gelak ekitaldez beteak egongo dira. Zer gustatu hura izango duzu Kultur Etxeari esker. Izan ere, aurten luzatu diguten kultur eskaintza ezin zabalagoa baita: perkusioa, txalaparta, erlajazioa, sexualitatea, dantzak, puntu gurutzea, panderoa..

Oraindik ere garaiz zaudete izena emateko. Soilik deitu behar duzue telefono honetara: 94 493 78 60. Bestela email honetara idatzi. Dena den, eta ohi bezala informazio zehatzena bertako web orrialdean izango duzue.

Hortaz, zuen asialdirako planik ezean ikastaro sorta itzela dago hautatzeko, dena autogestioaren bidez.