santurtziko berbalagunok

Umeentzako ipuin kontaketak

2011-02-21T18:13:00.003+01:00

Kultur Etxeak antolatuta, otsailaren 27an, igandea, umeentzako ipuin kontaketak izango ditugu Krispuintxo ipuin kontalariaren eskutik. Ipuinen munduan murgiltzeko aukera izango dute bai umeek baita hain umeak ez direnek ere.

Helduak bagara ere, barnealdean ume bana eramaten dugu, bizitza beste era batez ikusarazten gaituena askotan beharrezkoa baita. Ume hori atera beharra daukagu errealitate gordinari aurre egiteko, alaitzen eta suspertzen gaituen umea. Gero eta gogorragoa den bizimodu honetan ume baten ikuspegia onuragarria da errazteko korapilatzen duguna.

Daramagun umea ateratzeko aukera izango dugu igande honetan.

Berbalagun Portugalete aurkezpena

2011-02-21T16:24:00.007+01:00

Berbalagun Portugalete egitasmoa jaio da. Egindako ahalegin handiak etekinak izan ditu, eta esan dezakegu ezkerraldeko sarea osatu egin dela. Sestao, Santurtzi, Barakaldo eta orain Portugalete. Ezkerraldean 400 berbalagun inguru dituen egitasmoa handitu egin da Portugaleteri esker.

Portuko Udalak baimena eman ostean, ekimena poliki-poliki martxan jarriko dugu. Urratsak egin dira, eta ostegun honetan, otsailak 24, aurkezpena egingo da Santa Klaran 19.00etan. Aurkezpen honetan ekimen honetan parte hartu duten hainbat lagun izango ditugu hizlari, besteak beste, Alfre Elgezabal Portugaleteko dinamizatzailea

Babesa eman diezaiogun aurkezpenera joanez!

Ongi etorri Portu!

Mendilagunak Erlon

2011-02-17T18:23:00.005+01:00

Hau talde hau!

Argazkian dituzuen neska-mutil puska-katxarroak mendilagunak dira. Otsailaren 13an Erlo mendira abiatu ziren gogotsu eta kementsu. Haizeari aurre eginez berriz ere euskara eta kirola uztartu zituzten.

Azken bolada honetan mendilagun kopurua igo egin da txangoen arrakasta handituz. Aurpegiei baino ez diezue erreparatu behar argi ikusteko gure mendilagun ausarten poza.

Hurrengo txangoa martxoan egingo dute, eta martxoko euskararen agendan iragarriko da jende gehiagok izena eman dezan. Euskaldun ditzagun mendiak!

Argazki gehiago ikusi nahi izanez gero klikatu hemen

KORRIKA 17ren kanta

2011-02-15T16:52:00.000+01:00

Jon Anzaren liburuaren aurkezpena

2011-02-15T16:24:00.006+01:00

Otsailaren 22an (asteartea) 19:30ean "Jon Anza ¿El último crimen de Estado?" liburuaren aurkezpena izango dugu Joseba Zinkunegi idazlearekin Kultur Etxean.

Lan honek ETAko militante Jon Anzaren bizitza azaltzen du, eta benetan gertatutakoa dakarkigu.

Halaber, estalki modura jardun duen ikerketaren ibilbidea marrazten du liburuak, gertakari larriak ezkutatzen saiatu dena; hainbat komunikabide, alderdi politiko eta eragile izan dira hori salatu dutenak, eta “gerra zikinaren” pasarte berri baten susmo sendoa hizketagai jarri dute.

Denok sagardotegira!

2011-02-14T17:03:00.003+01:00

Sagardoaren denboraldian murgilduta egonda, otsailaren 26an Hernaniko Larregain sagardotegia joango gara. Autobusa Santurtziko parkeko arkupeetatik aterako da 17:30ean.

Iazko ziklogenesia ahaztuta, afaldu aurretik poteotxoa egingo genuke. Afalostean, 01:00/1:30ean itzuliko ginateke. Batzuk ziklogenesiaren zain egon arren, ea eguraldiak laguntzen duen dena ondo ateratzeko. Iaz bi autobus bete genituen. Ea aurtengo erantzuna iazkoa bezain ona den eta iazko errekorra berdintzen dugun.

Santurtzi eta Portuko AEKn izena eman dezakezue, eta bertan ordaindu (39 €). Otsailaren 18a izena emateko azken eguna. TXOTX!!

KORRIKA arropa

2011-02-11T20:38:00.003+01:00

Berri dezagun armairua Korrikaren arropa erosiz!. Santurtzin ITOITZ dendan korrika arropa dugu. Mamarigako biragunetik hurbil dago Itoitz.

Mota askotako jantziak topatu ahal izango ditugu: kamisetak, sudaderak, prakak... Euskara bezain anitza den arropa. Argazkian daudenak bezain dotore egon nahi baduzue hurbil zaitezte Itoitzera eta aukeratu ondoen emango dizuen jantzia.

korrikaren aurkezpena

2011-02-11T19:48:00.004+01:00

Korrikaren atarian gaudela, hurrengo ostiralean, otsailak 18, AEK-k antolatuta, Korrika 17ren aurkezpena egingo da Kresala aretoan 19:30ean. Aurkezpenean aurtengo korrikaren nondik-norakoak azalduko dira, hala nola, leloa, omendua, korrika kulturala, euskalaklip lehiaketa... Aukera paregabea KORRIKA 17 girotzeko.

AEK-k antolatuta, Euskal Herri osoan zehar egiten den euskararen aldeko lasterketa honen prestaketa hasi da. Euskararen aldeko kontzientzia suspertzea, kaleratzea eta dirua biltzea helburu dituen ekimen hau gero eta hurbilago dago. Gure herritik apirilaren 15ean pasako da eguerdi aldera eta jada lanean gabiltza.

Lehenengo korrika antolatu zenetik 16 korrika eta 30 urte igaro dira. 30 urtez euskararen alde, normalizaziorako bidean, maite dugun herria euskalduntzen euskalakariak gara eta. Gogora ezazue: maitatu, ikasi, ari... euskalakari!

Informazio gehiagorako: http://www.korrika.org/.

Bertsolaritza ikastaroa

2011-02-10T16:50:00.004+01:00

Bertsolariak jaio ala sortu egiten dira, horixe da gakoa!.

Bertsolariak jaiotzen direla uste dutenei Kultur Etxeak sortu daitezkeela ere erakutsi nahi die Bertsolaritza ikastaroaren bidez. Mundu emankor eta zoragarri honetan murgildu nahi baduzu Kultur Etxeak aukera emango dizu asteazkenero 18:00etatik 19:30era.

Babes ditzagun euskara eta Kultur Etxea bertsoak eginez, kantuka ibiliz, euskararen mezua bazter guztietara hel dadin.

Nork esan zuen Mamarigan ez dagoela bertsozalerik? Izena emateko azken eguna otsailaren 14a. Izena emateko : mamarigakokultur@yahoo.es

Mendilagunak Erlora

2011-02-08T18:00:00.004+01:00

Mendilagunak berriro martxan dauzkagu. Igande honetan, otsailak 13, Erlo mendira abiatuko dira. Erlo Gizpuzkoaren bihotzean kokatzen den mendi erraza da, harkaitzez beteta dagoen arren. Igotzeko Azkoitiraino abiatuko dira eta bertan igoera hasi.

Txindokirako txango arrakastatsuaren ostean, mendilagunak inoiz baino motibatuago eta indartsuago daude igandeko irteeraren aurrean. Adorea eta kemena dira mendilagunen ezaugarriak, eta igande honetan edozein gailurretara igotzeko gaitasuna erakutsiko digute.

Ohi bezala 08:00etan geratuko dira Santurtziko parkeko tren geltokian.

Ibilbideari buruzko informazio gehiagorako: www.euskal-herria.org/node/13133.

Gora gure mendilagunak!!

Mintzapraktika egitasmoa neurtzen

2011-02-07T18:42:00.002+01:00

Ostegunean, otsailak 3, euskaltzaindiaren Bilboko egoitzan " mintzapraktika egitasmoaren eraginkortasuna neurtzen" ikerketaren emaitzen aurkezpena izan zen, Aztiker enpresak egindako ikerketa.

Honen arabera, gaur egun 3700 berbalagun inguru daude mintzapraktika egitasmoari babesa ematen. Dela Berbalagun, dela mintzalagun, dela mintzakide, jende andanak parte hartzen du egitasmoa handituz. Egunez egun handituz eta zabalduz doan egitasmoa parte-hartze itzelari esker.

Euskaldunok argi daukagu hau bezalako proiektu baten garrantzia, batik bat eremu erdaldunetan, eta egunero erakusten dugu eginez ondoen egiten duguna, berba eginez, hain zuzen ere. Normalizaziorako bidean denok daukagu zer esan, zer esan EUSKARAZ. Gizartearen arlo guztietan euskaraz mintzatzeko eskubidea izanik, defendatu behar dugu berba eginez eta elkarlanez.

Bestaldetik egitasmo honetan parte hartzen duzuen guzti-guztiak zoriondu nahi zaituztegu egiten ari zareten lanagatik. Adin tarte guztietako jendeak parte hartzen du egitasmo honen aniztasuna erakutsiz, Euskal Herria anitza baita. Aniztasuna ere ekintzei dagokienez: Tailerrak, ikastaroak, txangoak, poteoak, antzezlanak...

Bihotz-bihotzez ZORIONAK BERBALAGUN!!

Ipuinaren ordua

2011-02-04T19:14:00.002+01:00

Otsailaren 9an, bai Udal Liburutegi Sareak bai Kultura eta Euskara sailek antolatuta Ipuinaren ordua izango dugu liburutegi nagusian 17:30ean. Publiko orori zuzendutako ipuinak entzun ahal izango dira.

Utz diezaiogun geure irudimenari hegan egiten ipuinen erresumara!. Ahaztu egunerokotasuna eta bidaia dezagun nahi dugun lekura.

Informazio gehiagorako: biblioteca@santurtzi.net

Sasi guztien gainetik, euskaldun eta burujabe

2011-02-03T17:46:00.003+01:00

Euskal Herrian Euskaraz (EHE) herri mugimenduko eragile euskaltzaleak nazio manifestaziora deitu du otsailaren 12rako "Sasi guztien gainetik, euskaldun eta burujabe!" lelopean. Donostian izango da mobilizazioa eta Bulebarretik aterako da arratsaldeko 17:00etan.

Portugaletetik autobusa jarriko da, betiko lekuetan (Santurtzi, Portugalete, Sestao, Barakaldo eta Itzubaltzetako herriko tabernetan eta Mamarigako Kultur Etxean) izena emateko zerrenda izango duzue; Santurtziko parkean eta Javan 15:00etan hartzeko aukera izango da.

Horrekin batera, manifestazioaren lelo berbera daraman manifestua ere publiko egin dute EHEko kideek agerraldian. Aipatu manifestuaren aitzakiapean herri zein nazio mailako harreman dinamika zabala jarri du martxan eragile euskaltzaleak norbanako zein eragileei manifestuaren edukiak helarazi eta mobilizaziora erakartzeko. Manifestua EHEren webgunean ere eskegi da herritarrek sinatu dezaten. Manifestazioaren bukaerako ekitaldian ekimen berezirik ere egongo da. Izan ere, Jose Luis Alvarez Enparantza Txillardegiri merezitako omenaldia egingo baitzaio.

Manifestuari atxikitzeko hurrengo lotura sakatu:
http://www.euskalherrianeuskaraz.org/index.php/orokorra/483-sasi-guztien-gainetik-euskaldun-eta-burujabe

Nazio manifestazioaren inguruko informazio gehiago:
EHEren web orrialdean:
http://www.euskalherrianeuskaraz.org/

Santa Ageda Santurtzin

2011-02-01T17:19:00.002+01:00

Heldu zaigu, berriz ere, Santa Ageda. Bezperan, otsailaren 4an, Euskal Herrian oles egiteko ohitura izan dugu beti. Oles egitea norbaiti dei edo eskatzea da, ate joka diru eta janari eske ibiltzea. Gaur egun Euskal Herriko txoko askotan ohitura hau bizirik dago, hala nola, Santurtzin.

Santurtziko hainbat talde otsailaren 4an kalera ateratzen dira oles egitera. Aurten ere ohiturari eutsiz kaleak jende eta makilez beteko dira. Makila hartuta eta lehengo janzkeraz, dirua eta janaria biltzeko etxez etxe, atariz atari ibiliko dira.

Hona hemen abesten den kopletako bat:

Aintzaldun daigun Agate Deuna

Aintzaldun daigun Agate Deuna

bihar da ba Deun Agate

etxe honetan zorion hutsa

betiko euko al dabe.

Santa Ageda bezpera dugu

Euskal Herriko eguna

etxe guztiak kantuz

aukeratua duguna.

Bera-Kruzetik etorri gara

taldean neska-mutilak

Santa Ageda omenez hartuta

soinuaz eta makilaz.

Bat, bi, hiru... Eup!!!

Otsaileko agenda gori-gori dator!!

2011-01-31T19:25:00.002+01:00

Txindokirako irteera

2011-01-25T16:58:00.002+01:00

Eguraldia lagun, Txindokirako irteera oso arrakastatsua izan zen. 10 lagun bildu ziren euskara gailurrera eramateko. Durangon elurra egin arren, Gizpuzkoan eguzkia izan zuten lagun igoeran.

Igoeran mendilagunek Txindokik eskaintzen dituen bistez gozatu zuten. Mari, Euskal Herriko lamiarik ezagunena, bertan bizi bada ere, inork ez zuen ikusi. Mari ez zen haserretu, eta ez zuen ekaitzik sortu, mendian adeitasunez ibili ziren seinalea. Den - denak mendizale eskarmentadunak izan ez arren, zaitasunak zailtasun gailurrera iritsi ziren. Izan zuten oztopo bakarra hotza izan zen, baina jendearen berotasunak gorputzak epeldu zituen aurrera jarraitzeko.

Euskara oztopo guztien gainetik gailur guztietara helduko da! Mila esker mendilagunak!

Olentzerori gutunen sariketa.

2011-01-19T17:33:00.003+01:00

Olentzerok Gabonak hurbildu ahala urtero desioz betetako milaka gutun jasotzen ditu. Jostailuak, maitasuna, dirua, osasuna, itxaropena, duintasuna, errespetua,... denetariko eska diezaiokegu magikoa baita.

Duela 15 urtetik Euskara Sailak Olentzerori gutun lehiaketa antolatzen du. Gutun mordo bat jaso ostean urtarrilean Olentzerori gutunen sariketa antolatzen du. Aurtengo sariketa urtarrilaren 26an izango da Kresala aretoan 18:00etan.

Olentzerori bidalitako gutunik onenak zeintzuk izan ote diren jakin gura baduzu, hurrengo asteazkenean kresala aretoan hitzordua daukazu.

Mendilagunak Txindokira

2011-01-18T16:44:00.002+01:00

Urtarrilaren 23an, igandea, mendilagunak eguraldiak lagunduz gero, Aralarreko mendizerran dagoen Txindoki edo Larrunarri mendira igoko dira. Gipuzkoa eta Nafarroa artean dagoen mendi ospetsu hau igoko dute Mari haserretzen ez bada, Txindoki mendia Mari Euskal Herriko lamiarik ospetsuenaren bizilekuetako bat baita.

Mariren laguntzaz hurrengo ibilbidea egingo dute: Larraitz - Egurral lepoa - Txindoki - Egurral lepoa -Muitze - Larraitz. Ibilbideari buruzko informazioa: www.euskal-herria.org/node/13020

Animatuz gero igandean goizeko zortzietan Santurtziko parkean lotu dira mendia eta euskara uztartzeko.

Etxeko garagardoa egiteko tailerra

2011-01-10T16:55:00.004+01:00

Igande honetan, urtarrilak 16, Santurtziko Kultur Etxeak etxeko garagardoa egiteko tailerra egingo du. Egun osoko tailerra izango denez (11:00etatik - 18:00etara) bertan bazkalduko da giro aparta sortuz.

Garagardozaleek egundoko aukera izango dute ikasteko zelan egiten den etxeko garagardoa. Garagardozaleak ez direnentzat ere tailer interesgarria izan daiteke non ikasiko duten egunero ezin ikas daitekeena.

Izena emateko: mamarigakokultur@yahoo.es edo ezkerraldea@aek.org

Animatu eta ikasi garagardoa egiten euskaraz!!

Urtarrileko agenda ikusgai.

2010-12-22T17:13:00.002+01:00

Zer ote da euskalakaria?

2010-12-20T17:41:00.000+01:00

Euskalaklip lehiaketa

2010-12-20T17:38:00.000+01:00

AEK-k korrikarako antolatu duen lehiaketan parte hartu nahi?
Informazioa: www.korrika.org

Olentzero Santurtzira iritsiko da

2010-12-19T20:14:00.002+01:00

Negua gain-gainean dugula Olentzero etorri ohi zaigu honen berri ematera: jendea kale ertzetan zain, umeen alaitasuna, gurasoen irribarrea… Ohiko elementuak dira neguaren etorreran. Hemendik gutxira egunak ilun-ilunak izango dira, baina Olentzerori jaramon eginez gero, urtean izandako gazi-gozoak albora ditzakegu, eta urte berria kemen eta gertaera onez beterik helduko zaigu.

Santurtzin badakigu data hauek oso garrantzitsuak direla, eta hau dela eta, talde ugarik Olentzeroren irteerak antolatzen dituzte auzo guztietan: Kabiezes, Mamariga, Donibane, erdialdea…Bakoitzak aukera dezala zein duen gogokoago eta parte hartu abenduaren 24ko ekintza hunkigarri honetan!!!

Negu Eguna jaia Mamarigan!!!

2010-12-17T16:39:00.002+01:00

Ostegunean, abenduak 23, Kultur Etxeak Mamarigan Negu Eguna ospatzeko egun zoragarria antolatu egin du neguari ongi etorri beroa eman diezaiogun. Adin guztiei zuzendutako ekintzaz betetako eguna izango dugu.

Hona hemen Kultur Etxeak antolatutakoa:

18:00etan Triki poteoa eta salda zein gaztainak banatzen hasiko dira.

19:00etan Balkoitik Plazara Fredi Paia eta Katxo bertsolariekin

20:00etan Erromeria. Tartean desioak erre eta produktu ekologikoz hornituriko saskia zozketatuko dute

Herri kultura bultzatuz aurrera doan egitasmoa!!.

Berbalagunon triki poteoa

2010-12-13T17:03:00.003+01:00

Ostiral honetan, abenduak 17, 20:00etan Santurtziko berbalagunok hitzordua daukagu Txitxarran, Lagun Etxea tabernan. Gabonak gero eta hurbilago daudenez, oporrak hartu baino lehen triki poteo erraldoi bat antolatu dugu AEKrekin batera.

Lagun Etxea tabernan hasi eta batek daki non amaitu. Hori bai, Txitarra euskaldunduko dugula argi eta garbi dago. Gainera trikitilarien doinuek Txitxarrari ukitu berezia emango diote.

Ahaztu barik Gabonetan ere euskaraz egin behar dugula, maitatu, ligatu, jan, gozatu, oparitu...

Anima zaitezte eta har dezagun pote bana edo bina, hiruna, launa... EUSKARAREN ALDE!!

KORRIKA 17ren laguntzaile kanpaina

2010-12-13T16:29:00.004+01:00

Badator Korrika 17, AEK lanez lepo dabil . Baina Euskal Herria zeharkatzeko laguntza behar du, inoiz baino laguntza handiagoa. Laguntzeko era asko egon arren, hasieran bi nabarmentzen dira: Korrika Laguntzailea kanpaina eta Korrika materiala.

Korrikak, 1980an sortu zenean, euskarari bultzada handia emateaz gain, diru kopuru handia lortzea zuen xede. Izan ere, orduko AEKren egoera ekonomikoa eta jarduna kolokan zeuden. Ateratzen den diruarekin proiektu ezberdinak aurrera eramaten dira: eraikin berriak egitea, herrialderen bati laguntza berezia ematea...

30 urte igaro arren, AEK-k herritarren laguntza behar du bere proiektuak aurrera atera ahal izateko. EAEko egoera hobea bada ere, oraindik ez da nahikoa, eta Nafarroan eta Iparraldean diru-laguntzak oso urriak dira. Jaurlaritzarekin izandako harreman urriek egoera oker dezakete. Horretaz gain, badaude AEKn diru-laguntza publikoen bidez bete ezin diren hamaika egiteko, hala nola, matrikulazio prezioak ez igotzea edo jaistea, doakotasunaren aldeko bidetik.

Korrika Laguntzaile egiten direnek, 12 euroren truke, euskarari laguntzeaz gain, hainbat onura izango dituzte: Laguntzaile direla adierazten duen pina, ehunka komertziotan beherapenak Korrika Laguntzailea txartelari esker. Txartelarekin batera komertzioen zerrenda ekuratuko dute Euskal Herriko txoko askotan erabili ahal izateko.

Arropa ere badago dotore-dotere Korrikari ongi etorria emateko. Euskal Herriko jai eta azoketan saltzeaz gain, AEKren euskaltegietan ere egongo da.

Informazio gehiagorako pasa zaitezte Santurtziko aektik. Korrikaren inguruko informazioa nahi izanez gero abenduaren 16an KORRIKA 17ren webgunea martxan egongo da: http://www.korrika.org/

Kultur Etxearen ikastaroen jaia

2010-12-03T17:15:00.003+01:00

20 urtez lanean, borrokan, ametsetan, sentitzen, defendatzen, sustatzen, maitatzen... 20urtez euskaraz, 20 urtez IRAKASTEN.

Abenduaren 10ean Kultur Etxeak antolatuta, IKASTAROEN JAIA ospatuko da Mamarigan, 20:00etan. Egun berezi honen xedeak Kultur Etxean ematen diren ikastaroen berri eman, ikastaroetan parte hartzen duen jendeak elkar ezagutu eta herriari kultura zabaltzea dira. Honengatik ez da jai itxia izango, herriari begirako jaia baizik. Gainera pintxo dastaketa izango dugu sukaldaritza taldeari esker.

Kutur Etxeak egiten duen lana ezagutzeko ezin aukera hobea.

Animatu eta murgildu kulturan!

Abenduko agenda prest!

2010-11-30T14:34:00.005+01:00

Euskararen Nazioarteko Eguna

2010-11-29T21:02:00.004+01:00

Abenduaren 3an Euskal Herriko txoko askotan Euskararen Nazioarteko Eguna ospatuko da. Santurtzin Euskara Sailak Bihotz Gaztea ikastolaren laguntzaz hainbat ekintza antolatu egin ditu egun honetarako.

17:00etatik 20:00etara adin guztietako pertsonei zuzendutako jolas gunea egongo da non jolas eta jostailu tradizionalen bildumatxoa egingo den. Honetaz aparte, euskal kirol eta jolasak, tailerrak, txirrista puzgarria...

Geure hizkuntza aldarrikatzeko eguna ere bada. Argi eta ozen esan behar dugu gure kulturaren oinarria dela eta edozein une eta lekutan erabiltzeko eskubidea dugula. Hala ere, aldarrikapenik onena egunerokotasuna da. Egunero erabiliz babestu eta bultzatuko dugu.

Animatu eta bizi euskaraz!!

Patata Tropikala: "Mendiko Altxorra"

2010-11-24T16:53:00.002+01:00

Larunbat honetan, azaroak 27, 12:00etan Euskara Sailak antolatuta "Mendio Altxorra" Kale antzerkia Gernika parkean izango dugu.

Mendi guztiek arima eta altxor bat gordetzen dute. Gure mendiak itsasoarekin muga egiten duenez izaki asko bizi dira bertan: loreak, iratxoak... Hala ere, lantzean behin "Metalezko Gizonak" etorri ohi dira altxorraren bila eta edozein gauza egiteko prest daude...

Txontxongiloak, animaliak, umorea eta ezusteak erabiliz, haur eta helduek euskaraz gozatuko dute.

Xilipurdi taldea: Gaur jaia

2010-11-15T17:54:00.002+01:00

Larunbat honetan Euskara Sailak antolatuta Xilipurdi taldea Gernika parkean izango dugu 12:00etan.

Publiko ororentzako animazio eta musika ikuskizuna: Parte hartzeko jolasak, puxikak, uztaiak, lehiaketak, dantzak... . Pailazokeriak bata bestearen atzetik etorriko dira bai umeek bai gurasoek parte har dezaten.

Aire-Airean

2010-11-15T17:36:00.002+01:00

Ostegun honetan, Euskara Sailak antolatuta Jose Ramon Agirreren "Aire-Airean" ikus-entzunezkoa Kresala aretoan 20:00etan.

Baltistan Pakistango iparraldean dagoen herrialdea da, Txinako mugaldean eta Iparraldeko Eremuak izeneko lurraldean kokatutakoa, Kaxmiren. Oso inguru menditsua da, batez beste 3.500 metroko altueran. 300.000-400.000 pertsona bizi dira bertan.

Pakistango mendirik altuenak hemen daude kokaturik: K2 (8.611 m), Nanga Parbat (8.125 m), Gasherbrum I (8.068 m), Broad Peak (8.047 m) eta Gasherbrum II (8.035 m).
Bestela, bost ibar nagusi ditugu inguru honetan: Kharmang (Kartakhsha), Khaplu, Skardu, Shigar eta Rondu.

Mendia gustuko dutenek aukera paregabea izango dute lurralde menditsu hau ezagutzeko eta burua erabiliz murgiltzeko. Oso gustuko ez dutenek ere Baltistanen dauden paisaiez goza dezakete.

Murgil gaitezen euskaraz lurralde menditsu honetan!

Azaroko agenda

2010-11-08T17:03:00.002+01:00

Santurtziko azaroko agenda prest dago . Aurreko astean Bai Esanek antolatuta, Kerman izan genuen gure herrian, eta Euskara Sailak antolatuta, Kidam magoa. Hurrengo ateetarako ekintza ugari daude. Anima zaitezte eta bizi euskaraz!

Korri eta Salto pailazoak

2010-11-05T17:35:00.003+01:00

Azaroaren 13an, Euskara Sailak antolatuta, Korri eta Salto pailazoak izango ditugu Gernika parkean "Artista bat naiz ni" ikuskizunarekin.

Pailazo hauek arlo guztietan sekulako artistak direla erakutsiko digute esketx dibertigarriz betetako antzezlan honetan, hala nola, musika kontzertu txiki bat, pintura eta eskultura saioa, zinea, dantzak... .

Bai umeek bai gurasoek aukera bikaina izango dute pailazoen munduan euskaraz murgiltzeko.

Kidam magoa: "Txintxin magikoa"

2010-11-02T11:46:00.004+01:00

Larunbatean, azaroak 6, Asier Kidam magoa izango dugu Gernika parkean 12:00etan. Mago trebe honen mirari harigarriak ikusteko parada izango dugu, hala nola, ur bat-batean izoztua edo magia egiten duen pelutxea.

Euskara Sailak antolatutako ume eta gurasoentzako ekintza aproposa. Ez galdu magiaren liluraz gozatzeko aukera!

Salam kale antzerkia

2010-10-25T18:15:00.003+02:00

Euskara Sailak antolatuta urriaren 30ean, larunbata, 12;00etan Gernika parkean Salam kale antzerkia. Publikoa plazara eramaten duen kale antzerkia. Bi magrebik eta euren gameluak gozaraziko digute Magrebeko arte eta musika herrikoiaren benetako erakustaldi batekin eszenatoki inprobisatu batean.

Ume eta gurasoentzako ekintza aproposa.

Euskara Hobetzen ikastaroa

2010-10-21T15:05:00.004+02:00

Datozen asteotan Mamarigako Kultur Etxeak Euskara Hobetzen ikastaroa martxan jarri nahi du. Euskaldun osoa bazara, baina zure maila hobetu nahi baduzu egiten dituzun hutsegiteak zuzenduz eta euskaltzaindiaren arauen berri izan nahi baduzu, aukera paregabea daukazu. Maila hobetzeari begirako ikastaroa da, eta ez euskara ikasteari begirakoa.

Kultur Etxeak aukera ezin hobea eskaini nahi die euskaldun osoei euren euskara maila hobe dezaten.

Euskaraz hazi, ikasi eta bizi!

Interesatuta bazaude:

- Emaila: http://www.kulturetxea.com/

- Telefonoa: 94 493 78 60

Anbotorako irteera

2010-10-20T18:54:00.003+02:00

Mendilagunak berriro ere martxan daudenez, Anbotorako irteera antolatu dute igande honetarako (urriak 24). Makilei hautsa kendu ostean berriro ekingo diote euren zaletasunari, hots, mendiak igotzeari. Ibilbidea exijentea bada ere, zailtasun handirik ez da topatuko; Badakizue, gogoko tokian aldaparik ez.

Ibilbidea hauxe izango da: Arrazola - Zabalaundi - Anboto - Anboto Sakona - Repetidorea - Arrazola.

Mendia eta euskara bateratzen dituen ekintza honetan parte hartzeko aukera izango dugu. Euskarak gailur guztietara heldu behar du eta.

Izena eman nahi izanez gero : ezkerraldea@aek.org

Euskal Jaia 2010

2010-10-18T17:22:00.003+02:00

Urriaren 23an 11:00etatik aurrera Gernika parkean Euskal Jaia izango dugu Euskara Sailaren eskutik. Mota askotako ekintzak egongo dira, hala nola, artisauak, herri kirolak, erromeria...

Hauxe da egun horretarako prestatu den egitaraua:

11:00-15:00/17:00-20:00 Artisauen txokoa

11:00-15:00 Jumpig-a (ohe elastikoa eta tentsoreak)

13:00 Herri Kirolak (zerra, ingudea, lasto altxatzea, orga jokoa, trontza...)

15:00 Herri Bazkaria (Bazkarirako txartelak aldez aurretik eros daitezke 15euroan Mamarigako Maisu jatetxean eta Pazo Doval tabernan)

18:30 Erromeria Aiko taldearekin.

Egun osoan Santurtzi Gastronomika ostalarien elkartearen txosna zabalik

Kale animazioa: Dangiliske euskal fanfarria

Anima zaitez, eta parte hartu!!

Ipuin Kontalaria

2010-10-18T16:55:00.003+02:00

Urriaren 21ean arratsaldeko 17:30ean Donibaneko liburutegian, Ipuin Kontalaria egongo da Liburutegi Sareak antolatuta.

Ipuin Kontalariaren laguntzaz imajina ditzakegun leku eta pertsonaia bitxienak ezagutzeko aukera izango dugu. Edonora joan gaitezke soilik imajinazioa erabiliz. eta ostegun honetan aukera izango dugu, eta gainera euskaraz!!

Bai umeek bai gurasoek gozatzeko ekimen aparta.

Xabinaitor antzezlana

2010-10-14T16:58:00.005+02:00

Hurrengo ostegunean, urriak 21, Xabinaitor antzezlan barregarria ikusteko aukera izango dugu SKAn (Serantes Kultur Aretoan) arratsaldeko 20:30ean.

"Xabinaitor" Patxi Gallegoren komiki batean oinarritutako umorez beteriko antzezlana da, antzezleak Wazemank telesaioaren egileak dituena.

Xabinaitor EGA titulua daukan super-heroi bakarra da, beti prest egoten dena emakumeen edertasuna gurtzeko. Heroi berezi honen pasadizo dibertigarri eta lotsagabeei esker barrez lehertzeko aukera izango dugu, eta euskaraz!!

Berbalagun aurkezpena urriaren 22an

2010-10-13T17:46:00.002+02:00

Berbalagun aurkezpen mundiala

Hurrengo ostiralean, urriak 22, Berbalagun 2010-11 aurkezpena izango da Kresala aretoan arratsaldeko 20:00etan. Aurkezpen mundial honekin ikasturte berriari hasiera eman nahi diogu berbalaguna den eta ez den jendea gonbidatuz. Aurkezpenaren ostean lunch bat egongo da , eta luncharen ostean poteoa.

Anima zaitez eta etorri!!

Atera arbela kalera

2010-09-29T18:39:00.003+02:00

Hona hemen aurtengo kanpaina berriaren bideoa. Euskal Herriko txoko askotako lagunak agertzen dira berbalagun proiektua bultzatzeko asmoz. Gure herria ere azaltzen da eta Santurtziko berbalagun batzuk ikus daitezke. Gozatu bideoaz eta ea hurrengoan animatzen zareten parte hartzera.

Badugu Urriko agenda prest!!

2010-09-28T17:41:00.002+02:00

Udazkenak euskarazko ekintza saldoa ekarriko digu. Ez dago modu hoberik euskaraz bizitzeko geure bizitza euskararen munduan sartzea baino. Beraz, parte hartu ekintzetan eta ekin euskarari! Hona hemen urriko agenda:

Beethoven Bostgarrena filma ikusgai izango dugu.

2010-09-23T17:38:00.002+02:00

Urriaren 8an ostirala 18:00etan, Santurtziko umeek Beethoven Bostgarrena filma ikusi ahalko dute Las Viñasko liburutegian Udal Liburutegi Sareak antolaturik. Hona hemen sinopsia:

Beethoven Sarahrekin joango da udako oporraldiak pasatzera osaba Freddieren herri meatzarira. Halako batean, txakur bihurri honek gorderik zegoen altxor gogoangarri baten mapa topatuko du. Aurkikuntzak hautsak harrotuko ditu herrian, eta hiritar guztiek koipea emango diote Beethoveni sekretu hau beraiekin parteka dezan.

Bertso poteoa El Bullonen.

2010-09-22T17:53:00.008+02:00

Asteburu honetako larunbatean, irailak 25, eguerdian El Bullon-Mahastiak jai batzordekoek Bertso Poteoa antolatu dute Julen Erezuma eta Jokin Castaños bertsolariekin. Auzo txiki eta eder honetan jaiak segituan hasiko dira, eta argi dagoenez, euskarak bere tartetxoa egitea lortu du ekimen erakargarri honen bidez.

Honenebestez, Santurtziko euskaldunok espero baino goizago ekin beharko diogu euskara tabernaz taberna hedatzeari, eta El Bulloneko jaiak eszenatoki ezin egokiagoa izango dira xede hori erdiesteko. Gainera, Jai Batzordeak oso egitarau herrikoi eta parte hartzailea eskainiko digu irailaren 24tik 26ra bitartean. Mota guztietako ekintzak, era guztietako jendearentzat.

Zure oporrak kontatu nahi?

2010-09-20T18:59:00.003+02:00

30 urtetik beherako gazte santurtziarra bazara, Gazteboxek parada ezin egokiagoa eman gura dizu zure oporren berri emateko, Gazte oporrak ekimenari esker. Izan ere, Gazteboxen opor planen libururako era guztietako kontakizunak behar dira, eta beti izan daiteke interesgarria gutako edozeinek bizi izandako pasadizoren bat. Gainera, lagungarria da oso etorkizuneko oporraldiak gauzatzeko. Askotan irudimen faltak ez digu plan erakargarririk gorpuzten uzten, eta beharbada, alboko lagunak sekulako plana burutu du eta guk horren arrastorik ez!!

Bada, kontakizuna gizarte sareen bidez zabal dezakezu (tuenti, facebook..), email bidez (gib-oij@santurtzi.net) edo Gazteboxera hurbilduz. Urriaren 31 azken eguna duzu zure istoriotxoa plazaratzeko. Informazio gehiago Gazteboxen bertan eskuratu dezakezue. Soilik parte hartzeagatik zozketa batean sartuko zarete. Saria ez da batere makala: asteburu bat bi pertsonentzat landetxe batean.

Beethoven bigarrena filma ikusgai.

2010-09-20T18:27:00.003+02:00

Beethoven txakur bihurriak bere balentrien erakustaldi bikaina eskainiko digu pelikula honetan, Beethoven Bigarrena. Ohi bezala, Newton familiaren egonarria kolokan jarriko du bere ateraldi xelebreekin, baina oraingoan berritasun garrantzitsu bat egongo da: Beethovenen bidean txakur eme xarmangarri bat gurutzatuko da, eta sendia handitze bidean has liteke... Haur zinema emanaldia hauek Udal Liburutegi Sareak antolatu ditu, eta ostiral honetan, irailak 24, ikus dezakegu Las Viñasko liburutegian 18:00etan.

Zer dakizu Iran herriari buruz?

2010-09-13T10:59:00.005+02:00

Zaila da herri bati buruzko iritzi osatua izatea bertara joan barik, are zailagoa gure aburua hedabideek esandakoaren arabera eratzen dugunean. Iran, adibidez, maiz azaltzen zaigu albistegietan, eta maizegi berri txar eta bortitzak jasotzen ditugu herri honen harira. Hau honela izanik, gutariko anitzentzat pentsaezina litzateke itxurazko gatazka batean dagoen herrialde batera bidaiatzea, ez gaude-eta ganbaratik jota!!!

Baina norbaitek esango baligu, itxurak itxurak direla, barreneraino joan beharra dagoela benetako izaera ezagutze aldera, agian, beste Iran bat ezagut genezake aurreiritzirik gabe. Beharbada, Iran: topikoen aurkako bidaia bat egin genezake Asier Arantzabal eta Mila Gallastegi bidaiariekin. Ziurrenik, beste era bateko informazioa emango digute, lehen eskukoa eta interesik gabea. Bene-benetakoa. Honenbestez, hitzordua duzu irailaren 23an (osteguna) 20:00etan Kresalan ibilbide atsegin eta xarmangarri bat egiteko Udal Euskara Sailak antolaturik.

Badatoz Mamarigako Kultur Etxeko ikastaroak!

2010-09-07T11:28:00.004+02:00

Mamarigako Kultur Etxeak ez ditu 20 urte alferrik bete, eta kultur dinamika inoiz baino biziago dagoela erakusteko, ikastaro zerrenda ederra kaleratu du gure asialdia era libreago batean igaro dezagun. Tailerretako batzuk ohikoak dira, hots, urterik urte jendeak eskatzen dituenak. Beste batzuk berriak auzoko jendeak proposatu eta eman gura dituelako, eta beste zenbait Kultur Etxeak berak loturikoak. Hona hemen etxe autogestionatu honetan euskaraz egin ditzakegunak: Txalaparta tailerra, Perkusio ikastaroa, Sexualitate tailerra, Euskara hobetzen ikastaroa, Malabareak, Kontserba tailerra, Bertsolaritza...

Hauexek dira oraingoz urritik aurrera abian jarriko dituzten ikastaroak, baina gerora askoz ekimen gehiago etorriko dira. Beraz, hauetako batean izena eman nahi izanez gero, idatzi email bat edo deitu telefonoz (94 493 78 60) eta zehaztu zein ikastarotan parte hartu nahi duzun.

Iraileko agenda egina dago!!

2010-09-06T09:52:00.002+02:00

Iraila euskaraz lepo datorkigu eta hamaika ekimen izango dira denon gozamenerako. Ikusi, hautatu eta parte hartu!!! Hona hemen agenda.

"Kerman mintzalagun bila" saioan parte hartu nahi duzu?

2010-09-03T10:11:00.007+02:00

Bai Esan euskara elkartetik proposamen erakargarri bat heldu zaigu berbalagunoi. Geurean euskaldun berriak garenez ia-ia guztiok, zenbaitetan zailtasunak dauzkagu gura dugun dena euskaraz adierazteko. Telebistako Kerman mintzalagunari gertatu ohi zaion bezala, hain zuzen ere. Eta ETBtik Bai Esan eta berbalagunok gonbidatu gaituzte Kerman mintzalagun bila programan parte hartzera, hots, telebistan ateratzera euskaraz moldatzeko zailatasunak dauzkan pertsonaia xelebre honekin. Berbalagun eta euskaltzaleok animatuko al gara? Hala bada bidaliguzue email bat irailaren 20a izan aurretik!!. Hona hemen Kerman mintzalagun bila saioaren adibide bat ikusi eta gozatu!!

Bai Esan euskara elkartearen deia!!

2010-09-03T09:55:00.004+02:00

Santurtzin ugariak dira euskararen alde diharduten elkarte eta taldeak. Baina bat nabarmentzekotan, Bai Esan euskara elkartea aipatzekoa da, euskaldun askoren bilgunea delako.Baita azken urteotan Santurtzin gauzatu diren ekimenetan buru-belarri ibili delako ere. Honek eskatzen dituen lan mordua eta ilusio iturria direla eta, Bai Esanek Santurtziko euskaltzaleoi dei berezi bat egin gura digu.

Hastear den ikasturte honetan, erronka berriei ekiteko, Bai Esanek partaideak behar ditu. Bi eratan egin dezakezu:

*Elkarteko bazkidea izan zaitezke, Bai Esanen txartela jaso eta hainbat abantaila lortuko duzu zenbait denda eta kultur ekimenetan.
*Edota bi astean behin Bai Esaneko batzarretara joan zaitezke; horrela, era aktiboago batean parte hartuko duzu, Santurtzin euskararen egoera hobetze aldera. Galderak, proposamenak egiteko, edo animatuz gero, idatzi email honetara: baiesan@kaixo.com.

Euskarari zure aletxoa eman nahi badiozu, Bai Esan euskara elkartean parada ezin hobea daukazu. Anima zaitez!

Mamarigako jaiak badatoz!!!

2010-09-02T12:14:00.004+02:00

Irailaren 3tik 12ra bitartean Mamarigako jaiak ospatuko ditugu auzo xelebre honetan. Auzokoek beraiek antolatzen dituzten festa hauetan denetarik aurki dezakegu baina hementxe euskara hutsean burutuko denaren laburpentxoa egingo dugu:

Irailak 3 ostirala ordu txikietan Laiotz erromeria taldean Mamarigako plazan.
Irailak 4 larunbata 13:00etan Kantu Poteoa Mamarigako koadrilekin Kaixo tabernatik abiatuta, eta gauez 00:00etan Beste Bat erromeria taldea plazan.
Irailak 5 igandea 12:30ean Dantzaldia plazan Mamarigako Etorkizuna eta Bihotz Gaztea dantza taldeen eskutik.
Irailak 10 ostirala 23:00etan Santurtziko Aldats taldearen kontzertua.
Irailak 11 larunbata 00:00etan Luhartz taldearekin azken erromeria.
Irailak 12 Elkartasun Eguna (azoka, zur-tailen erakusketa, harri zulatzaileak, herri bazkaria..)

Askoz gauza gehiago ere badaude jai herrikoi hauetan, eta informazio gehiago nahi izanez gero Santurtzialdia web gunean egitaraua oso-osorik daukazue.

Irailean euskara euskaltegietara eta Udaleko dirulaguntzak!!

2010-09-02T11:16:00.005+02:00

Urtero bezala irailarekin batera jende askori euskara ikasteko grina pizten zaio, baina gauza bat dela bestea dela beti uzten dio ihes egiten parada honi. Eta azkenean gauzatu gabeko egitasmoen kutxan satu behar dugu geure hizkuntzaren ikaskuntza. Bada aurten, euskaldunok eta euskara ikasi gura dutenek beste aukera bat izango dute euskarari ekiteko herriko bi euskaltegietan:

*Santurtziko AEK euskaltegia: Fleming Doktorea 17. Tlf: 94 493 80 71/607 515 720
*Santurtziko Udal Euskaltegia: Jose Miguel Barandiaran 12. Tfn: 94 461 02 15

Bestetik, eta joan den urtean legez aurreko ikasturtean euskaltegi homolotaguetan ibilitako ikasleek Santurtziko Udalaren dirulaguntza eskatzea dute irailaren 1etik urriaren 15era. Hauek dira bete beharreko baldintzetako batzuk:

-16 urte baino gehiago izatea
-Santurtzin erroldatuta izatea (gutxienez, eskaera egin baino 2 urte lehenagotik).
-HABEk homologatutako euskaltegitan egindako ikastaro ofizialduak izan behar dira.
-Eskatzaileak berak ordaindutako Ikastaroa izan behar, ez bestelako enpresak zein erakundek finantzatua.
-HABEk eskainitako diru-laguntzak eskatu, erankunde horrek ezarritako baldintzak betez gero.
- Ikastaro presentzialetan %80ko asistentzia izatea. Autoikaskuntza bidezko ikastaroetan eskatzaileak ikastarorako ezarritako helburu-maila gainditu duela egiaztatu beharko du.

Dirulaguntzen gaineko informazio xehea web orrialde honetan duzue.

Animo eta ekin euskarari!! Inork ez dezala esan Santurtzi herria euskararentzat arrotza denik. Ez horixe!! Euskarak apurka-apurka eta urrats sendoz indar handiagoa hartuko baitu!!

Uztaileko agenda sargoriarekin batera dator.

2010-06-30T19:02:00.004+02:00

Hona hemen uztailerako daukaguna. Udako azken mezua izango dugu hau, hortaz, udan ere segi euskarari eragiten eta irailean berriro hasiko gara matraka ematen. Ahhhh eta Karmen jaietan parte hartu euskarazko ekintzetan!!!

Berbalagunok artista hutsak zarete!!

2010-06-28T09:48:00.005+02:00

Kurtsoko azken tailerra gauzatzeaz batera, berbalagunok barruan daroaten adierazi gabeko artista azalarazi zuten arratsalde batez. Santurtziko AEKn bildu eta mahai baten bueltan Saioaren azalpenak adi eta zintzo entzun zituzten Fieltro Tailerrean ikasi nahi zutena ondo mamitzeko. Arratsalde parte horretan gure eskuak uste baino iaioagoak zirela egiaztatu ahal izan genuen, eta berbalagun batzuen alabak bertaratu zirenez euskara denon hizkuntza dela erakutsi genuen.

Emaitza ezin hobea: 14 lagun euskaraz, berriketan, barrez, eskulanak eginez, gauza berriak ikasiz, ekintzetan parte hartuz, euskara klasetik eta etxetik ateraz. Pena bakarra da tailerretik kanpo sei pertsona inguru geratu izana. Izan ere, eta dagoeneko ohitura bihurtu den legez, gure ikastaroak lar arrakastatsuak dira eta ezin dute hainbeste jende jaso. Baina beharbada hurrengo urtean atzera ere egingo dugu. Bitartean gozatu bertan ateratako argazkiekin (argazki gehiago hemen klikaturik)

2010eko Eki Egunari buruzko kronika eta argazkiak.

2010-06-24T19:53:00.005+02:00

Oroimenak dagoeneko huts egin digu eta ez dakigu Mamarigako Kultur Etxeak noiztik antolatzen duen Eki Eguna. Baina jakin badakigu Kulturrek 20 urte bete dituen honetan lan sakon eta gogotsua egin duela euskara eta euskal kulturaren alde. Honen adierazle esanguratsua azken Eki Eguna izan zen. Bertan, ohi bezala Patxi Perezen erromeriak lotsatienak jarri zituen dantzan salbuespenik gabe.

Honen ostean Kultur Etxearen aldeko kalejira jendetsuak kolore eta erritmoa eman zizkien auzoko kaleei perkusio eta suak lagunduta. Benetan une hunkigarriak bizi izan ziren ekimen honekin!!!

Eta azkenik, gazteek sua eman zioten aurtengo pitxiritxiari ume, gazte eta nagusion gozamenerako. Perkusioa beti bezala ezinbesteko protagonista izan zen, eta Kultur Etxeak ederto erakutsi zuen urte hauetan guztietan egindako lanak uzta bikaina eman duela. Argazki guztiak ikusteko klikatu honen gainean.

Pirritx, Porrotx eta MariMotots Kabiezesen izango dira

2010-06-21T18:46:00.002+02:00

Berriro ere Pirritx, Porrotx eta MariMotots Kabiezesera etorriko dira KAKULen (Kabiezesko Jai Batzordea) eskutik. Emanaldia ekainaren 24an (osteguna) izango da 19:00etan Kabiezesko plazan. Jendetza espero denez antolatzaileen gomendioei jaramon egitea eskatzen da: haurrentzako ikuskizuna den heinean helduek ez dute umeen aurretik egon beharrik, ahal dela umeak bakarrik egon ikuskizunak iraun bitartean, eta bereziki jarraibideak bete.

Kabiezes auzoko jaiak kolorez margotuko dizkigute, eta jakina, kantatu, dantzatu eta salto egingo dugu beren abesti zoragarriak entzunez. Hitzordua dugu euskararan alde!!

Bertso bazkariaren kronika eta argazkiak.

2010-06-21T18:29:00.004+02:00

Ikasturte honek ganorazko agurra behar zuen, eta oraindik ere triki poteoa geratzen bazaigu ere, ezin uka larunbateko bertso bazkaria ikaragarrizkoa izan zenik!! AEK eta Bai Esanek antolaturiko ekimen honi Peru Vidal, Beñat Vidal eta Joanes Igeregi bertsolariek ukitu berezi eta xarmanta eman zioten. Haiei esker barre algara ederrean jardun genuen bertaratu ginen 56 lagunok.

Bazkaria primerakoa, bertsoak zirikatzaile eta dibertigarriak, giroa paregabea... Zinez pozik ibili ginen bertsoak aditu bitartean. Gainera, ez ziren gutxi izan goizeko ordu txikiak arte Bertso Bazkaria luzatu gura izan zutenak. Larunbat arratsalde eta gauean Mamariga euskaldun bilakatu genuen une batez!! Datorren urtean ere matraka ederra emateko moduan gaude. Argazki guztiak ikusteko klikatu honen gainean.

Euskara ikasi nahi duzu Udan?

2010-06-17T18:22:00.005+02:00

Udan herriko bi euskaltegietan euskaraz ikasi edo sakontzeko aukera izango dugu. Hona hemen zehaztapenak:

*AEK: Uztailean 5tik 30era trinkoak. Ordutegia: 09:00-14:00. 100 eskola ordu eta 157 euro dira. Izena emateko azken eguna ekainaren 30a. Email: santurtzi@aek.org. Tfna: 94 493 80 71.

Eta irailean HABEren azterketak prestatzeko ikastaroak 2tik 30era. Ordutegiak: 09:00-13:00(88 ordu eta 132 euro) eta 16:00-19:00 (66 ordu eta 99 euro). Izena emateko azken eguna ekainaren 30a. Email: santurtzi@aek.org. Tfna: 94 493 80 71.

Udan ere AEKrekin barnetegiak (barnetegi arruntak, ibiltariak oinez eta bizikletaz, familia edo jarduera barnetegiak...) egiteko aukera dago. Interesaturik bazeunde jo Santurtziko AEKra

*Udal Euskaltegia: HABEren azterketak prestatzeko ikastaroak uztailaren 1etik 29ra eta irailaren 1etik 28ra. Ordutegia: 08:30-13:00 (87,2 euro).Izena emateko azken eguna ekainaren 23a (uztailerako) eta uztailaren 9a (irailerako). Email: admin@santurtzi.eus. Tfna: 94 944 61 02 15

Eta Mintzamena lantzeko ikastaroa uztailaren 1etik 29ra edo irailaren 1etik 28ra. Ordutegia: 10:00-12:00 (43,6 euro). Izena emateko azken eguna ekainaren 23a uztailerako edo uztailaren 9a irailerako. Email: admin@santurtzi.eus. Tfna: 94 461 02 15

Triki poteoa Txitxarran: euskaraz barra-barra!!

2010-06-16T17:43:00.006+02:00

Kurtsoa bukatzear dela ikusirik, AEK-ko lagunek Triki Poteoa antolatu dute ekainaren 25ean (ostirala) 20:00etan Txitxarrako Lagun Etxetik abiatuta. Argi dagoenez berbalagunok eta herriko euskaltzale guztiok gonbidaturik gaude, eta euskara kalera atera behar dugula uste dugunez ederra litzateke bertan ahalik eta euskaldun gehien biltzea.

Giro jator, atsegin eta dibertigarria ziurtaturik izango dela ziurtatu didate. Antza denez, batek baino gehiagok irrikaz begiratzen dio ekaineko sasoi honi euskararen alde poteoren bat antolatzen dela dakielako, eta denon nahiak betetzen ahalegindu behar!!! Ez gara gu izango poteo bati ezetz esango diogunak. Honenbestez, berbalagunok pozik eta gogotsu parte hartuko dugu triki poteo honetan. Areago lehengo poteotan zein ondo pasatu dugun kontuan hartuz gero!!

Liburu azoka Santurtzin.

2010-06-16T17:29:00.005+02:00

Datorren astetik aurrera, ekainaren 18tik 27ra, Liburu azoka izango dugu Santurtziko Gernika parkean. Ekainean ia zeharo ezkutatu zaigun eguraldi onak lagunduko gaituelakoan, zenbait gauza gauzatu ahalko dugu gure euskara praktikatu eta hobetzeko. Zehazki bi ekintza izango ditugu gure hizkuntzan:

*Ekainaren 22an (asteartea) 11:00etan umeentzako ipuin kontalaria
*Ekainaren 24an (osteguna) 19:00etan Kirmen Uribe olerkari eta idazleak hitzaldia eskainiko du gune honetan.

Begi-bistakoa denez ekimen honek ume zein nagusien jakin-mina aseko du, hortaz, iragarritakoa zure gustukoa izan daitekeela uste baduzu parte hartu lituraturaren aldeko jai honetan.

Fieltro tailerra egiteko prest?

2010-06-14T17:56:00.005+02:00

Esku lanak egitea gustatzen zaizue?? Berbalagunok poteo gehiegi egiten dugula uste duzue?? Orain aukera aparta izango duzue zuen trebetasuna proban jartzeko. Izan ere, Fieltro Tailerraren bidez lepokoak, belarritakoak, panpinak, pinak... Nahi duzuena egin dezakezue material hau erabiliz!!. Dena den, ez larritu honelakorik inoiz egin ez baduzue, dinamizatzaileok nahiko traketsak baikara!!.

Noiz: ekainak 24 osteguna 19:30ean

Non: AEK euskaltegian

Parte hartu nahi baduzue bidali email bat urtarrilaren 22a baino lehen, edota deitu zenbaki honetara: 94 493 80 71. Materiala ordaintzeko bina euro jarri behar dugu, ondo pasatzeko prest??

Eki Eguna Mamarigan Kultur Etxearen XX, urteurrenean.

2010-06-14T17:39:00.003+02:00

Ekainaren hondarretan bada berezi samarra den egun bat. Bere izaera eta ezaugarriengatik bereiz daitekeen ospakizun magiko bat: Eki Eguna ekainaren 23an, asteazkena. Mamarigako Kultur Etxeak urte luzez seinalatu digu egun hau gure egutegietan, eta dagoeneko, alboratu ezineko jaia dugu.

*Aurten ere 19:30ean Patxi Perez eta Konpainia taldearen erromeria edukiko dugu Mamarigako frontoian. Bitartean kulturlagunek parrillan egindako txorizo eta saiheskiak banatuko dituzte.

*21:30ean Kultur Etxearen aldeko kalejira aldarrikatzailea abiatuko da frontoiko plazatik auzoan zehar. Ondoren Santurtziko gazte mugimendukoek pitxiritxia erreko dute sua piztearekin batera.

Umeak, gazteak, nagusiak.. Denok izango dugu tokia 20. urteurrena ospatzen ari den Kultur Etxearen jai honetan. Hortaz, anima zaitezte eta parte har ezazue!!. Informazio gehiago hemen.

Doraemon eta Zazpi Aztiak.

2010-06-14T17:33:00.004+02:00

Santurtziko ume eta gurasoek elkarrekin gozatu ahalko dute Udal Liburtegi Sareak ekainaren 18an (ostirala) eskainiko duen filmarekin 18:00etan Las Viñas liburutegian: Doraemon eta Zazpi Aztiak. Katu kosmiko honen balentria berriak denok gozatzeko modukoak izango dira.

Kurtso bukaerako Bertso Bazkaria!!!

2010-06-11T18:47:00.003+02:00

Urtero bezala ekainak uda etortzear dela ez ezik Bertso Bazkaria ere badugula gogorarazten digu. Eta zentzuzkoa denez, Santurtziko berbalagun eta euskaltzaleok ezin diogu tamaina horretako proposamen bati muzin egin. Hau dela eta, denok AEK euskaltegiak eta Bai Esan euskara elkarteak antolaturiko jaitxo honi baiezko borobila emango diogu, eta ekainaren 19an 14:30ean Mamarigako Itsasoko Ama eskolan Bertso Bazkari mundial honetan parte hartzeko prest egongo gara. 18 euro balioko du eta hau da menua (lehen/bigarren platera, postrea eta edaria):

Lehen platera: Paella otarrainxkekin edo pasta hegaluze eta barazkiekin

Bigarren platera: Solomoa piperrekin edo legatza

Izena emateko azken eguna ekainaren 18a izango da (bidali email bat edo pasatu AEKtik) eta zer menu hartuko dugun zehaztu behar da. Bertsolariak zein diren oraingoz ezin dizuegu esan konfirmatzeke baitago, baina egon egongo dira. Euskaraz gurekin gozatzeko prest??

Bereterretxeren kanthoria berbalagunokin

2010-06-07T17:53:00.002+02:00

Berbalagunok Udal Euskaltegiaren laguntzaz aho narrazio bikaina izango dugu Begoña Gomez Kandelen Argipean taldeko ipuin kontalariarekin: Bereterretxeren Kanthoria ekainaren 17an (osteguna) 20:00etan Kresalan.

Antzinako garaietara eramango gaituen kantu honek guk uste baino sekretu gehiago eskainiko digu. Askoren ustez abesti lasaigarri eta patxadatsua denak istorio sakon eta misteriotsuak gordetzen ditu bere baitan: gezurrak, traizioak, hilketak... Hona hemen hau laburbiltzen duen bideotxoa. Euskal ohitura zahar eta liluragarri honetan murgiltzeko prest?

Arrasateko Mintza Eguna itzela izan zen!

2010-06-07T17:36:00.007+02:00

Ikaragarri ondo igaro zen berbalagunok urtero ospatzen dugun Mintza Eguna. Goizean goiz Arrasateko mintzalagunek harrera beroa egin ziguten era guztietako jaki zein edariak probatzera gonbidatuz. Artean jende asko falta zen arren, lehen tortillen usaina bereganaturik jende andana hasi zen plazara hurbiltzen, eta era honetan, Euskal Herriko txoko guztietako ehunka berbalagun batu ginen geure mingainak askatzeko prest. Honetarako, Topaguneak atondu zuen egitaraua hagitz aproposa izan zen: harrera, Arrasateko bisita gidatua, triki/kantu poteoa, herri bazkaria (300 lagun!), erromeria...

Gure eskualdetik 17 pertsona animatu ginen, eta egiaz ederra izan zen Getxo, Donostia, Gernika.. eta zenbait tokitako berbalagunekin berba egitea. Gainera, une ederrak izan ziren bazkariaren ostean sari banaketa burutu zenean. Izan ere, gure mintzakide nekaezinak Juanan eta Mikel omendu zituzten oso modu hunkigarrian. Argazki guztiak ikusteko klikatu hemen.

Loiolako Hegiak liburuaren aurkezpena.

2010-06-03T19:21:00.004+02:00

Datorren asteko asteartean, ekainak 15 19:30ean, hitzordu interesgarria izango dugu Mamarigako Kultur Etxean. Bertan Imanol Murua izango da bere azken liburua Loiolako Hegiak aurkezten Kultur Etxeak bere XX. urteurrenaren baitan kokatu duen ekitaldian.

Erakargarri samarra da gaur egun dugun egoera korapilatsuan, iraganeko irakaspenetatik zerbait ikastea. Hauxe aurkituko dugu hitzaldian:

2004 urtean bakerako akordio baten bila Batasuna, EAJ eta PSEren ordezkariak biltzen hasi ziren Loiolako Arrupe etxean. Esperantza handia zegoen han jarrita, baina porrota etorri zen handik gutxira.“Zer gertatu zen Loiolan?” galderari erantzuten saiatu da Imanol Uria. Jesus Egiguren, Arnaldo Otegi eta Iñigo Urkullu politikariekin jardun eta elkarrizketa horietatik abiatu da Loiolakoen nondik norakoak eta porrotaren arrazoiak eraikitzeko saioa, eta hori da Loiolako Hegiak liburura ekarri diguna.

Gai honek denon interesa merezi du ezta? Azken baten gure herriaren egoera konpontzeko iraganeko jazoerak aztertu behar dira.

Kultur Egunaren kronika. XX. urteurren paregabea!

2010-06-01T19:17:00.005+02:00

20. urteurren ederra ospatu zuten Mamarigako Kultur Etxekoek. Ikustekoa zenbat jende hurbildu zen egun osoko egitarauan programatuta zeuden ekintzetara. Goizean lagun ugari ibili ziren ikastaroen erakustaldiak miresten eta parte hartzen, baita galdezka ere hurrengo ikasturtean parte hartzeko xedez. Sexualitate, txalaparta, malabare, perkusio, puntu gurutze… Pandero eta ipuin kontaketa tailerrekoek poteoa alaitu zuten. Umeek, beren aldetik, puzgarrian izan zuten ondo pasatzeko hitzordua.
Bazkaria ere ez zen atzean gelditu eta 140 lagunek bapo bazkaldu baitzuten giro euskaldun eta alaian. Cotton Club animazio taldeak bere ukitu jazzeroa eman zien Mamarigako kale jendetsuei. Izan ere, Mamarigako jaiak zirela zirudien hainbeste lagun zegoen eta. Eta azkenik, kontzertuko Norte Apache, Sexty Sexers eta Hora Zuluk gogorarazi ziguten zer aberasgarria den Kultur Etxea bezalako gune bat izatea. 20 urte euskal kultura sustatzen, eta beste hainbeste izan daitezela! Gure argazkiak ikusteko klikatu honen gainean, eta argazki guztiak hemen.

Meatzari museora berbalagunokin!!

2010-05-31T17:51:00.003+02:00

Larunbat goizeko berbalagunek beste ideia liluragarri bat plazaratu digute: Gallartako Meatzari museoa bisitatzea ekainaren 12an (larunbata). Bisita 12:00etan denez, 11:30ean lotuko gara tren geltokian. Bisitak 3 euro balio du. Etorri nahi baduzu bidaliguzu email bat ekainaren 9a baino lehen. Hona hemen bertan aurkituko dugunaren laburpentxoa:

Hamabost urte jardunean egon eta gero, Meatzaritzaren Museoa Kultur Elkartearen bildumak burdin ustiategietako pieza, lanabes eta makina ugari eskuratu ditu. Materialon artean nabarmenena mea garraiatzeko bagoi eta bagoitxoen bilduma da, Euskal Herriko handiena. Aipatzekoak dira, modu berean, berreskuratu diren balde-lerroen astoak eta mea garbitzeko tromelak eta abar. Neurri txikiagoko piezen artean, eguneroko erabilerako elementu batzuk aipatu ahal ditugu: erauzketa-tresnak (mailuak, aitzurrak…), lanparak, txokloak (oinetako tipikoak), teodolitoak, laztabinak, zulatzeko koilaratxoak, bagoiak kontatzeko abakoak eta abar. Kasu askotan, pieza hauek Bizkaiko meatzaritzaren urrezko garaitik (XIX. mendearen bukaera eta XX.aren hasiera) gordetzen diren bakarrak dira.

Koldo Amestoy ipuin kontalaria Santurtzin.

2010-05-31T17:35:00.004+02:00

Dagoeneko usadio bihurtu den ekintza baten berri emango dizuegu: Koldo Ameztoy ipuin kontalaria 20:00etan Kresalan ekainaren 10ean (osteguna) berbalagun eta Udal Euskaltegiari esker. Ez dugu gogoratzen zenbat alditan etorri zaigun ipuin kontalari xarmangarri hau, baina argi dagoena da santurtziarrok izugarri maite ditugula istorioak kontatzeko duen maisutasuna eta eragiten dizkigun era guztietako zirrarak!!

Honenbestez bete zuen burua amets eta bizipen ederrez, izan ere, Koldoren irudimen eta solas gozoek beste Euskal Herri batera eramango zaituztete Kresalatik mugitu barik. Euskal Herria bizi-bizi dagoen beste eremu batera. Berarekin elkartzeko prest?

Berbalagun, UEUko ikastaroak eta deskontuak

2010-05-31T17:28:00.003+02:00

Aurton ere, mintzapraktika egitasmoetan (berbalagunen) parte hartzen duten lagunek %25ko deskontua izango dute UEUk antolatzen dituen udako ikastaroetan. Horretarako baldintza hauek bete beharko dira:

Egitasmo batean parte hartzea.

Bestelako diru-laguntzarik ez jasotzea (bere udalarena, foru aldundiarena...)

Izena eman aurretik eskaera egin behar da, baieztatu ostean, ikasleak matrikula egingo du. Dudarik gabe, udan euskara lantzeko beste aukera paregabe bat.

Enkarterriari bira bizikletaz!!

2010-05-27T19:24:00.005+02:00

Eguraldi ederra izan genuen lagun aurreko asteburuan egin genuen bizikleta txangoan. Giro epela eta konpainia ona (15 txirrindulari batu ginen). Goizean goiz Barakaldotik Gueñes aldera abiatu ginen Alonsotegitik igarota, berbalagun askoren iritziz goizegi heldu ginen gure txangoaren helmuga zen tokira (Barakaldo-Gueñes-Barakaldo), eta eguerdia besterik ez zela ikusi genuenez jendea animatu zen ibilbide luzeagoa egitera, azkenean Galdames aldera jo genuen mendate labur (askori luzea egin zitzaigun!) bat igoz. Gaitz erdi Dabid gurekin zela bide posible guztiak erakusteko eta tropelaren egoeraz arduratzeko! Balentria egindakoan Galdamesen otordu txiki baina bizigarri bat egin genuen patxada handiz.

Hortik mugitu beharra sumatu genuenean, bide berdetik Portugalete aldera abiatu ginen bizikleten pedalei gogoz eraginik. Eta bukatzeko izerditan blai eta hankak akituta baina umorez lepo etxerako bidea hartu genuen (Sestao, Getxo, Bilbo, Barakaldo edo Santurtzi). Eguraldi bikaina izango dugu hemendik aurrera, eta begi-bistakoa denez, ez gara etxean geratuko! Argazki guztiak ikusteko klikatu honen gainean.

Ekaineko agenda euskaraz blai!!!

2010-05-25T17:40:00.002+02:00

Ekaineko agenda ekimen zoragarriz josita datorkigu. Batzuk ohikoak, besteak berritzaileak, baina benetan eskaintza ezin oparo eta ugariagoa izango dugu. Ikusi, hautatu eta egin euskaraz!!

Futbolin txapelketa Gazteboxekin

2010-05-25T17:25:00.003+02:00

Nori ez zaio fubolinean aritzea gustatzen?? Batek baino gehiagok eskumuturrak gogor zigortu ditugu aurkariak baino gol gehiago sartu guran, eta jakina, honelako trebezia neurrigabea erakustea ez legoke batere txarto. Ildo honetan, Gazteboxek ideia zinez interesgarria eduki du eta Futbolin txapelketa izugarria antolatu du ekainaren 4rako 18:00etatik 22:00 arte Gazteboxeko pergolan.

Izen-emateak euro bat balio du, eta gogoan har ezazue ekimen honetan parte hartzeko 30 urtetik beherakoa izan behar dela. Epea maiatzaren 17tik zabalik dago eta ekainaren 2an amaituko da. Euro baten truke txapelketan parte hartzeko moduan egongo zarete. Eskumuturrak koipeztu behar ezta?

Bertsolari txapelketa Enkarterrin.

2010-05-24T19:10:00.004+02:00

Nork uka dezake Santurtzin euskaltzaletasuna areagotu den bezala, bertsozaletasuna ere ikarri areagotu dela?? Orain urte batzuk pentsaezina izango zen gure eskualdean hainbeste bertsolari izatea, eta are sinisgaitzagoa zer-nolako zabalpena lortzen ari diren ikustea. Bada, jende askok burutu duen lan eskergari esker Enkarterriko ezkerralde honetan bertsolari finak ditugu, eta gainera, Santurtzitik oso gertu (Zierbenan) izango dugu Enkarterri eskualdeko bertsolari txapelketa.

Aingeru Basterretxea, Ion Berrocal, Jokin Castaños, Imanol Arrutia, Idoia Anzorandia eta Aitor Arrutia izango ditugu Zierbenako frontoian ekainaren 5ean (larunbata) 18:00etan Aitor Gorostiza gai jartzaile arituko delarik. Parada paregabea dugu gure inguruko bertsolariak zertan diren ikusi ahal izateko, hortaz, bertsozaleok hitzordu ederra dugu egun horretan.

Garagardoa nola egin ikasi gura al duzu?

2010-05-24T18:51:00.005+02:00

Mamarigako Kultur Etxeak beste ideia berritzaile bat ekarri digu bere 20. urteurrenaren harira: Garagardoa egiten ikasteko ekimena. Hitzaldi formatoa duen emanaldia izango da, izan ere, praktikoa izateko hilabeteak behar ditu garagardoak prozesu osoa betetzeko. Ekainaren 4an (ostirala) 19:00etan Kultur Etxean Igor Goiburu hernaniarrak saio teoriko hau eskainiko du garagardozale amorratuontzat.

Era honetan, Kultur Etxeak autogestioa ere eramango du garagardoaren esparrura, eta pentsa ezazue zein gozoa izan daitekeen nork bere garagardoa etxean sortu, gorde eta edatea!! Ziur ez duela zer ikusirik supermerkatuan edo tabernetan saltzen digutenarekin, areago garagardo artisaua edaten ari garela esan badezakegu!! Gainera, Igorren hitzetan garagardoa egitea dilistak egitea baino errazagoa da. Inor animatuko al da??

Nire auzotarra Totoro umeentzako filma

2010-05-24T18:44:00.002+02:00

Santurtziko ume eta gurasoek elkarrekin gozatu ahalko dute Udal Liburtegi Sareak ekainaren 4an (ostirala) eskainiko duen filmarekin 18:00etan Las Viñas liburutegian: Nire auzotarra Totoro, Hayao Miyazaki zuzendari ospetsuaren lan esanguratsuenetako bat. Hona hemen laburpena:

Sendagileek gomendaturik Kunasabe sendia hiritik zelaira joango da amaren gaixotasuna arintze aldera. Satsuki eta Mei alabek bere etxe berrian dauden izaki misteriotsuak aurkituko dituzte: eguneko argia jasaten ez duten kedarrezko bolatxoak. Egun batean Mei lasterka hasik oda bolatxo baten atzetik eta zuhaitz batean tximino/katu erraldoi bat topatuko du: Totoro. Totorok beren bizimodua aldaraziko die betiko.

Argazkilaritza tailerreko kronika

2010-05-21T19:21:00.003+02:00

Valen eta Rakel berbalagunek ikaragarri ondo bideratu zuten eurek prestaturiko Argazkilaritza tailerra. Mamarigako Kultur Etxean bildu ginen 10 berbalagunok gozatu ederra hartu genuen beren azalpenak entzun bitartean. Argazki kamerari atarramendu onena ateratzen ikasi genuen: nola hartu, argia zelan islatu, irudiak erdigunetik atera... Hamaika trikimailu aisialdian atera ohi ditugun argazkiak txukunagoak izan daitezen!!

Gainera, eskura izan genuen Valen eta Rakelek idatzitako apunte sorta bikaina (eskuratu gura izanez gero, bidali email bat), eta hau lagun, askoz aiseago irudikatu genuen urrats bakoitza. Baina argi dagoenez berbak berbak baizik ez dira, eta ikasitako guztia praktikan jartze aldera, berbalagunok Bilbon egin genituen gure saiakerak. Benetan ikastaro paregabea!! Argazkiak ikusteko klikatu honen gainean.

Santurtzitik Bermeoko ibilaldira.

2010-05-17T17:39:00.003+02:00

Bihotz Gaztea ikastolako Euskaraz Bizi - Guraso Batzordetik deialdia egin nahi digute:
Dakizuen moduan maiatzaren 30ean Bermeon 2010 urteko ibilaldia izango da (Marigoran Kikunbera). Jai horretara hurbiltzeko erraztasuna eman nahian, ikastolan autobus zerbitzua antolatzea erabaki dugu.Hauek dira datu garrantzitsuenak:

*IRTEERA SANTURTZITIK: PARKEA (Munich-en ondoan) ORDUA - 09:00etan

*ITZULERA BERMIOTIK: TOKIA - AUTOBUSAK UTZI GAITUEN TOKIA ORDUA - 20:00etan PREZIOA PERTSONA BAKOITZEKO - 8 euro.

Autobuserako txartelak ikastolako idazkaritzan erosi ahal dira maiatzaren 22arte. Egun horretarako autobusa ateratzeko gutxiengo kopurua 40 pertsona autobuseko ez bada lortu, irteera bertan behera geratuko da eta dirua idazkaritzan jaso ahal izango duzue hurrengo astean. ANIMA ZAITEZTE...!!!

Beronika udaberriko euskara izpia.

2010-05-14T18:18:00.003+02:00

Udaberria hotz gerturatu zaigun honetan, Beronika berbalagunak epeltasun apur bat eman digu bere esanekin. Ohi bezala, bideo honetan berbalagun baten hitz, iritzi eta nahiak entzungo dituzue (hortik euskara izpia!). Beharbada, zuetako asko Beronikak azaldutakoarekin identifikatuta sentituko zarete, izan ere, euskara titulu soil bat baino askoz ere gehiago da. Euskara bizitzeko eta komunikatzeko tresna dugu. Mila esker Bero zure berbengatik!!

Bai Esan eta Athletic.

2010-05-14T18:04:00.005+02:00

Bai Esan eta Athleticen artean dagoen harremana ezin hobea dela esan daiteke. Behin baino gehiagotan Athleticeko jokalariak egon dira geurean euren bizipenen berri ematen, eta aurten jokalariek Santurtzira etortzerik eduki ez duten arren, argi eta garbi gelditu zaigu Athleticeko jokalariek euskararekiko duten jarrera ona.

Athleticeko kanpo harremanetarako Jabi Uchak, gainera, barkamena eskatu zuen ume guztiek ikusi nahi zituzten futbolariak ez etortzeagatik. Baina ez zen esku hutsik azaldu, eta Kresalan egon ziren ume guzti-guztiek opari bana eraman ahal izan zuten etxera. Hau gutxi balitz, Bai Esan euskara elkarteari zin egin zion datorren urtean antzeko ekimen bat antolatu ahal izango dugula. Argazkiak ikusteko klikatu hemen.

Mendilagunak Itxina mendian

2010-05-14T17:44:00.003+02:00

Berbalagunon Mendi Taldeak gero eta jende gehiago biltzen du bere baitan. Apurka-apurka ezkerraldeko mendilaguna abian den zurrumurrua zabaldu da, eta honen eraginez, gero eta gehiago gara mendira gozatzera ez ezik euskaraz mintzatzera ere joaten garenok. Honen adierazle onenak dira Itxina mendian mendilagunek ateratako argazkiak. Denak ikusi nahi badituzue klikatu honen gainean.

Beste alde batetik, ekimen honetan parte hartu nahi baduzu, ez pentsatu bitan eta ausartu zaitez urratsa ematera. Nola? Bada oso erraza. Soilik idatzi behar diguzu email bat (ezkerraldea@aek.org). Honen ondoren zurekin jarriko ginateke harremanetan beharrezko azalpenak emateko. Dena dela, futsezkoena honako hau da: hilean behin mendira joango zara eta euskaraz egingo duzu berba! Hurrengo mendia zein izango den erabakitzeko bilera ekainaren 11n Santurtziko AEKn 20:00etan.

Gazteboxen zozketak.

2010-05-12T16:46:00.006+02:00

Santurtziko gaztea bazara, eta 30 urte baino gutxiago baduzu, Gazteboxek maiatzaren 28rako (ostirala) antolatu duen zozketan parte har dezakezu. Soilik bidali behar dizkiezu zure datuak (izen-abizenak, adina, emaila eta telefonoa) beraiek prestatzen dituzten ekintzen gaineko informazioa jasotzeko. Email honetara idatzi behar duzue: gib-oij@santurtzi.net

Hauexek dira sariak:

- 14-18 URTE DITUZTENENTZAT: 4 sarrera Gueñeseko kartingera joateko eta 6 sarrera Sopuerta Abenturara joateko.
- 18-30 URTE DITUZTENENTZAT: 4 sarrera Art After Darkera joateko Guggemheimen, sarrerarekin Feverrerako joateko aukera izango duzu.

Ez da sari makala, eta soil-soilik informazioa eskatzeagatik!!

Barakaldo-Gueñes-Barakaldo bizikleta txangoa!!

2010-05-10T18:47:00.007+02:00

Jakina da berbalagun proiektua gero eta handiagoa dela, gero eta euskaldun gehiago biltzen garela euskarak eskaintzen dizkigun babes eta beroaren pean. Gainera, denetarik egitea dugu gustuko, eta inguruko berbalagunok ezagutzeko beta luzatzen badigute, ezin muzin egin. Oraingoan Ezkerraldeko eta inguruko berbalagunok Sestaoko talde batekoek egindako gonbita burutuko dugu: maiatzaren 22rako (larunbata) Kadaguaren ibilbidea (Barakaldotik Gueñesera joan-etorria) txirringaz egitea proposatu digute eta guk Ezkerraldeko euskaltzale guztiak (eta inguruetakoak ere, jakina!) gonbidatu nahi ditugu. Gure plana honako hau da:

Santurtziarrok 08:15ean Santurtziko metro geltokian lotuko gara Barakaldorantz abiatzeko asmotan gainerakoekin biltzeko.

Alonsotegitik Gueñesera abiatuko gara (20km). Itzultzeko, Feve zerbitzua dago nahi duenarentzat. Barakaldotik 50 km dira, joan eta etorri. Ibilbidearen mapa ikusi nahi baduzue, egin klik hemen. Behin hiritik irtenda, oso bide erreza eta ederra da, bidegorrietatik.

Egun horretan euria egiten badu, plana bertan behera geratuko da. Izena emateko eguna markatuko dugu, maiatzaren 22an zenbat elkartuko eta zenbaten zain egon behar dugun jakiteko. Horretarako e-maila idatzi behar diguzue, maiatzaren 20a baino lehen, eta zuen izen-abizenak aipatzeaz gain, zein herritakoak zareten esan behar diguzue. Animatu eta etorri gurekin pedalei eragitera! Ez kezkatu, erritmo lasaian joango gara, ez pentsatu profesionalentzako irteera denik!

Pirritx, Porrotx eta MariMototsen Piratak filma.

2010-05-10T18:10:00.007+02:00

Guraso eta haurrentzako ekintza interesgarria aukeztu digu Udal Liburutegien Sareak: Pirritx, Porrotx eta MariMototsen Piratak filma eskainiko digute maiatzaren 21ean (ostirala) 18:00etan Las Viñas liburutegian. Gure artean zeresan ugari lortu zuen pelikula honek umeak txundituko ditu. Hona hemen sinopsia:

Lagun bihurri eta kilikagarriekin, denon artean, irri eragiten diguten uneak gogoratuko ditugu, eta barre, kantu eta dantza artean, egunero bizi, sentitu eta ikasten dugunaren puzzlea osatuko dugu. Zatitxoz-zatitxo, maitasunez bizitakoa ez dugu sekula ahaztuko. Are gutxiago pirateb mundu zoragarrian barna hau bezalako bidaia bat egiten badugu. Piraten antzera bizi, pentsatu eta jardun egingo dugu!

Urrearen sukarraren historioa. Yukon ibaia kanoaz.

2010-05-10T17:47:00.004+02:00

Santurtziarrok bidaiari sena gure baitan dugula ukaezina da. Izan ere, tankera honetako ekintzek sentsazio atsegina uzten digute eta horrekin batera gure gogoa hegaletan hasten da ezinezko mugarri bila. Honetaz jakitun, Udaleko Euskara Sailak istorio berebizikoa ekarriko digu datorren ostegunean, maiatzak 20, 20:00etan Kresalan ikusteko. Bertan Josu Iztueta abenturazale tolosarrak Urrearen sukarraren historioa kontatuko digu bideo proiekzio baten bitartez.
Era honetan, Yukon ibaian kanoaz egindako balentriek aho zabalik utziko gaituzte zenbait bitxikeria arretaz entzun ahalko ditugulako. Esaterako, urrea bertan aurkitu zutenean 100.000 lagun baingo gehiago abiatu ziren Yukon alderantz, beharbada, munduko exodo handiena gauzatuz. Oraingoan bertan egindako egonaldi liluragarriaz gozatzeko abagunea izango da.

Gernikako bonbardaketa dantzara eroanda.

2010-05-10T17:35:00.003+02:00

Aukeran dantza konpainiaren eskutik ikuskizun ezin hobe eta egiaz zirraragarria ikusi ahal izango dugu ostirla honetan, maiatzak 14, 20:30ean SKAn 10 euro ordaindurik. Emanaldi honen izena Gernika mihise gaineko dantza. Hona hemen bere xehetasunak:

Lanaren hari nagusia Guda Zibilean Gernikak jasan zuen bonbardaketa da. Bizkaiko herri honek jaso zuen erasoaren gaineko hainbat eszena-atal ikusiko ditugu, Picassoren izen bereko margoari esker, herri oso baten oroimen kolektiboan oraindik bizirik dirauen erasoa. Hilotzak inguratzen dituzten hil-oihalek euren historia kontatu nahi digute. Estetika zuri-garbiak lagunduta, azoka-egun arrunt bateko eszenak ikusiko ditugu. Baina herriak eta herritarrek jaso zuten bonbardaketak egun honen oroitzapena betiko suntsituko du, eta horrelaxe jasoko du historia unibertsalak.

Kontserba tailerreko argazkiak

2010-05-10T17:23:00.002+02:00

Euskarak apurka-apurka bide egiten du gure artean. Hasieran jende gutxiri bururatuko zitzaion hainbeste gauza desberdin egiteko batzea, edota hori posible zela sinistea. Bada, adibideak denon begi-bistan daude, eta dagoeneko gero eta lagun gehiagok daki Santurtzin gauza asko egin daitezkeela euskaraz. Bereziki, jende ugari dabilelako geurean euskararen alde, hau dela eta, antolatzen diren tailerretara era guztietako euskaldunok gerturatzen gara. Honen adierazle garbia izan daiteke Mamarigako Kultur Etxeak antolatu duen Kontserba Tailerra. Bertara 15 euskaldun joaten dira eta argazki hauetan ikus dezakezue zein ongo pasatzen duten gure hizkuntza erabiliz. Argazki guztiak ikusteko klikatu honen gainean.

Baionako Mendi Taldekoen gonbidapena

2010-05-05T17:47:00.003+02:00

Jakina denez, urtarrilean Ezkerraldeko berbalagunok Mendilagun ekimena abian jarri genuen. Harrezkero, ugariak izan dira Euskal Herrian zehar mendi talde euskaldunekin izan ditugun harremanak. Bereziki aipagarriak dira Baionako Mendi Taldeak eskaini dizkigun ekintza nahiz txangoak, benetan paregabeak. Baina gauza bat dela bestea dela ezinezko izan zaigu elkartzea, hau dela medio, Baionako lagunek gonbidapen xarmangarri egin digute behar beste denboraz:

Ekainaren 19an: SAIOA BELATETIK (900m desnibela, 13km luzeera), hitzordua finkatzekoa da momentukotz, ibilaldiaren ondoren pote bat hartuko dugu eta proposatzen dizuegu gaua Baztanen igarotzea, horrela Arizkun herriko festak ospatuko ditugu, Baztango aterpe batean lo eginen dugu eta igandean Amaiurko gaztelu inguruan tokiko nahiz Nafarroako historia ezagutu ahalko dugu. Hortako eskatzen diogu jendeari izena emaiteko (lo egiteko) ekainaren 5a baino lehen. Ateraldi huntarat gomitatuak dira: Baztango AEKko gau eskola, Geu Gasteizekoak taldea, Bizkaiko Ezkerraldeko Mendilagun taldea.

Azken hauek gu gara!! Zer ez al zaizue ideia polita iruditzen? Hala bada gogoan hartu asmoa asteburu pasa egitea dela. Beraz izena eman behar da ekainaren 5a baino lehen email honi idatziz.

2010eko Mintza Eguna Arrasaten

2010-05-05T17:36:00.005+02:00

Euskal Herri osoko berbalagun, mintzalagun, solaskide eta euskaltzaleok batzen gaituen jaia ailegatzear dugu. Aurtengo Mintza Eguna Arrasaten ospatuko dugu ekainaren 6an (igandea) eta Santurtzi zein Ezkerraldetik lagun nahikotxo animatuz gero, busa jarriko dugu!! Ez geratu berbalagunon festa erraldoi honetara etorri gabe, ez al litzateke pozgarria izango Euskal Herriko txoko guztietako ehunka mintzalagun elkartzea?? Etorri nahi baduzu bidali email bat helbide honetara: ezkerraldea@aek.org. Hona hemen egitaraua eta bazkari txartela lortzeko baldintzak

11:00etan: Ongi etorria eta hamaiketakoa Biteri plazan
12:00etan: Ibilbide gidatua
13:30etan: Kalejira
14:30etan: Bazkaria Herriko plazan
15:30etan: Sari banaketa
16:00etan: Erromeria Kataia taldearekin

BAZKARIKO XEHETASUNAK:
Bazkari txartelaren prezioa 20€-koa da.
Menua: Patea, Paella, oilasko “pilotak” eta solomoa, postrea, kafea + Kopa + Erromeria.
Izen ematea: maiatzaren 21 baino lehen.

Euskaraz bizitzeko eskubidea!

2010-05-05T17:27:00.002+02:00

Nafarroako euskalgintzak maiatzaren 15ean Iruñean egingo den manifestaziora deitu du. Euskarak Nafarroan bizi duen egoerarekin kezkatuta eta Nafarroako Gobernuak euskararekiko duen kontrako jarrera salatzeko manifestazioa antolatu dute Euskararen Gizarte Erakundeen Kontseiluak, euskalgintzako kideek eta norbanako euskaltzaleek. Nafarroan euskalgintzan diharduten talde eta norbanako ugarik agertu diote babesa manifestazioari. Hau dela eta, jende uholde handia biltzea espero da hau ozenki aldarrikatzeko: Euskaraz bizitzeko eskubidea.

Deialdiarekin bat egiteko klikatu hemen. Segituan bideo polit hau duzue. Berbalagunok ere euskaraz bizi nahi dugulako.

Berbalagunon Argazkilaritza tailerra.

2010-05-03T17:39:00.002+02:00

Asteazken arratsaldeko berbataldeko Valen eta Rakeli esker laster izango dugu abian tailer txundigarri bat: Argazkilaritza tailerra!! Aparteko trebeziarik ez da behar, izan ere, ikastaro arin honen xedea oinarrizko ezagutzea eskuratzea izango baita. Modu honetan, hautsez beterik duzun argazki kamarari ahal den atarramendu onena ateratzen ikasi ahal izango dugu Rakel eta Valenen argibideak aintzat hartuz gero.

Bertan parte hartzeko izena eman behar da maiatzaren 12a izan aurretik, tailerra maiatzaren 13an (osteguna) eta 16an (igandea) burutuko baitugu. 13an 19:00etan Mamarigako Kultur Etxean lotuko gara arlo teorikoa ikasteko, eta 16an 10:00etan metro geltokian egongo gara Bilbora joan ostean barneratutakoa praktikan jartzeko. Ez al zarete animatuko? Etorri berbalagunokin eta egin mila gauza desberdin euskaraz!!! Izena emateko bidali email bat edo pasatu AEKtik: 94 493 80 71.

Hotsak Hezurretan zuzenean!!!

2010-05-03T17:31:00.005+02:00

Arrazoi bat dela bestea dela, azken asteburuetan moduren bat lor dezakegu euskarazko ekitaldiren batean parte hartzeko. Zurrunbilo euskaldun honek San Jorge jaiak pasata bukaera izango zuela aurreikusi zuten batzuek. Baina La Kelo Gaztetxearen ekimenez Deustuko talde gazte baina etorkizun oparoko talde bat ikusi ahalko dugu maiatzaren 8an (larunbata) 21:00etan: Hotsak Hezurretan. Musika talde honen musika zertan den ikusi nahi baduzue gozatu beheko bideoaz!! Sarrerak 2 euro balio du

Mendilagunak Altipitatx mendira abiatuko dira!

2010-04-27T18:44:00.003+02:00

Mendilagunen hurrengo txangoa maiatzaren 9an izango da (igandea), eta aditu askoren arabera Bizkaiko mendi erakagarrienetako bati ekingo diote datorren irteeran: Altipitatx mendia hain zuzen ere. Orozkotik gertu kokatuta dagoen gain honek eskaintzen dizkigun ikuspegiak izateaz gain, naturarekin jarriko gaitu harremanetan Arratia haran ederrean murgilduko baikara.

Oraindik mendilagun ekimena martxan ote zebilen ez bazenekien, hauxe da zure parada Euskal Herriko txoko miresgarrienak euskaraz ezagutzeko. Txangora etorri edo mendilaguna izan nahi baduzu bidaliguzu email bat.

Barriola San Adriango azeria filma.

2010-04-27T18:37:00.003+02:00

Guraso eta haurrentzako ekintza interesgarria aukeztu digu Udal Liburutegien Sareak: Barriola San Adriango azeria filma eskainiko digute maiatzaren 7an (ostirala) 18:00etan Las Viñas liburutegian. Nazioartean zeresan ugari lortu zuen pelikula honek umeak txundituko ditu. Hona hemen sinopsia:

Hodeitik erorita bihurtu zen azeria azeri, alegia maltzur. Geroztik, oiloari muzin egin gabe, putrea noiz lumatuko bizi da: ikazkinaz bezalaxe. Zertarako hainbeste neke egurketan, mendiko bidean hainbeste inozo dabilela, eta batzuetan diruz betetakoak? Batzuetan gizon, bestetan azeri; aldian ikazkin, aldian lapur.. horrelaxe bizi dira Aizkorriko ikazkinak, Barriola buru, azeri galanta.

Film laburren VII. emanaldia.

2010-04-27T18:22:00.005+02:00

Urtero bezala Bai Esan euskara elkarteak Euskal Herriko zinema hurbilduko digu gure zentzumenen gozamenerako. Aurtengoa film laburren VII. edizioa izango da jada, eta datorren asteko asteko ostegunean, maiatzak 6, 20:00etan Kresalan laburmetraia hauek guztiak ikusgai izango ditugu:

Amona putz ( 9´04").Telmo Esnal.

Ahate pasa ( 12´ 58"). Koldo Almandoz.

Nora zoaz? ( 4´02" ). Josu Bergara.

Zorion hutsa ( 12´56") Janire Fernandez.

Esaiok ( 7´39"). Jon Murray

Clark eta Boris ( 11´30"). Iñigo Garcia.

Odisea Etxaldean ( 4´30" ). Urko Mauduit

Neguko hitzak ( 3´15"). Blackandeker films (KAMERATOIA 2009)

Nireak dira ( 2´04"). Epalzaren alargunak (KAMERATOIA 2009)

Aukera zinez paregabea Euskal Herriko zuzendari gazteek egiten duten zinema zelakoa den ikusteko. Bertan ikusiko dugu elkar!!!

Maiatzeko agenda oparo baino oparoagoa!

2010-04-26T18:00:00.002+02:00

Hona hemen maiatzerako euskaldunok izango duguna. Ikusi ahal duzuenez, denetarik aurki dezakezue: tailerrak, jaiak, hitzaldiak, musika, bertsoak... Hautatu zure gogokoa eta heldu euskarari!